3؍ ارب روپےسے قلعہ کہنہ قاسم باغ ملتان کی تزئین و آرائش کی جائیگی

ملتان (سٹاف رپورٹر) 3؍ ارب کی خطیر رقم سے قلعہ کہنہ قاسم باغ کی تزئین و آرائش کی جائے گی، ٹینڈر ہو چکے ہیں فنڈز کی فراہمی کے ساتھ ہی اس منصوبے پر عمل شروع کر دیا جائے گا، ایوان تجارت و صنعت ملتان میں سابق صدر اور کنوینر گورنمنٹ لیئزان سب-کمیٹی خواجہ محمد حسین کی سربراہی میں ایک اجلاس میں ڈائریکٹر والڈ سٹی اتھارٹی نجم الثاقب نے قلعہ کہنہ قاسم باغ کی تزئین و آرائش کے حوالے سے شرکا کو بریفنگ دی، انہوں نے کہا کہ حکومت پنجاب نے قلعہ کہنہ قاسم باغ کی تزئین و آرائش اور تاریخی مقام کی حفاظت کے لیے تقریباً 3؍ ارب روپے مختص کیے ہیں جس کے تحت قلعہ کو انقلابی اقدامات کرتے ہوئے محفوظ اور خوبصورت بنایا جائے گا، ٹینڈر ہو چکے ہیں فنڈز کی فراہمی کے ساتھ ہی اس منصوبہ پر عمل درآمد شروع کر دیا جائے گا، انہوں نے بتایا کہ قلعہ کے چاروں طرف مٹی کے ڈھیروں کو سرسبز کیا جائے گا، لوہاری گیٹ سے حسین آگاہی تک نئی سڑک تعمیر کی جائے گی اور موجودہ سڑک کو ختم کر کے فصیل کو بحال کیا جائے گا۔