مریم نواز کے پاس پلیٹ لیٹس گرنے کا بھی علاج ہوگا،مہر بانو قریشی

ملتان (آئی این پی) پی ٹی آئی رہنما مہربانو قریشی نے کہا ہے کہ مریم نواز کے پاس جانوروں کا علاج ہے تو پلیٹ لٹس گرنے کا علاج بھی ہوگا۔ القادر ٹرسٹ کیس جھوٹا اور سارے کیسز سیاسی انتقام ہیں۔ پاکستان تحریک انصاف کی رہنما مہر بانو قریشی نے ملتان میں میڈیا سے گفتگو کرتے ہوئے کہا کہ ایک سو اسی دن کے اندر الیکشن پٹیشنوں کا فیصلہ دینا چاہئے تھا، لیکن 10ماہ بعدبھی صرف 27فیصد الیکشن ٹربیونلز کے فیصلے ہوئے۔سابق وزیر خارجہ شاہ محمود قریشی کی صاحبزادی نے کہا کہ جعلی مینڈیٹ پر موجود جعلی وزیراعلی دھمکیاں اور تڑیاں دیتی ہیں۔ جس کو وہ علاج کہتی ہیں ہم اس کو فراڈ، فریب اور فسطایت اور انصاف کا گلا گھوٹنا کہتے ہیں۔ رہنما پی ٹی آئی کا کہنا تھا کہ کوٹ لکھپت میں ہمارے پانچ لیڈرز بند ہیں، میرٹ پر فیصلہ ہوجائے تو ہمارے لیڈر ایک دن میں باہر ہونگے۔ مہربانو قریشی نے کہا کہ میرے مخالف ضمنی الیکشن میں بھی ہارے تھے‘ دھاندلی کے بغیر مخالفین جیت نہیں سکتے۔ ہم ملک میں انصاف کا نظام قائم کرینگے‘ سیاسی استحکام انصاف کے بعد ہی آئیگا۔