لیڈر جیل میں بیٹھا انتشار پھیلانے کی پلاننگ میں مصروف،چیلے باہر مگرمچھ کے آنسو بہاتے ہیں، عظمیٰ بخاری

لاہور( این این آئی)پنجاب کی وزیراطلاعات عظمیٰ بخاری نے کہا ہے کہ کل تک جو کہتا تھا چھوڑوں گا نہیں آج وہ سب کے پائوں پکڑ رہا ہے، لیڈر جیل میں بیٹھا انتشار پھیلانے کی پلاننگ میں مصروف،چیلے باہر مگرمچھ کے آنسو بہاتے ہیں،بہن اور بیوی اس کے جیل میں رہنے کے سب سے بڑے بینفشری ہیں،پارٹی کے لوگ نہیں چاہتے جیل سے باہر آئے، جب سے فتنےکامنہ بند ہے ملک کا ہر شعبہ ترقی کی طرف بڑھ رہا ہے۔ ان خیالات کا اظہار انہوں اسد قیصر کے بیان پرردعمل دیتے ہوئے کیا۔ وزیراطلاعات پنجاب کا کہنا تھاکہ وزیراعلیٰ پنجاب مریم نواز اڈیالہ جیل کے قیدی اور اس کے چمچوں کے اعصاب پر سوار ہیں، مریم نواز کو آپ کے مہاتما کی خواہش پر 2018 کے الیکشن سے قبل نااہل کروایا پھر باپ کے سامنے گرفتار کروایا،مریم نواز آج تاریخ کے بھاری مینڈیٹ سے وزیراعلیٰ بن کر پنجاب کی خدمت کر رہی ہیں۔اپنے بیان میں انہوں نے کہا کہ لیڈر جیل میں بیٹھا انتشار پھیلانے کی پلاننگ کرتا ہےجبکہ چیلے باہر مگرمچھ کے آنسو بہاتے ہیں، فتنے اور فتنہ پارٹی کی مکاریاں اور عیاریاں قوم بخوبی سمجھ چکے ہیں، کل تک جو سب کو کہتا تھا چھوڑوں گا نہیں آج وہ سب کے پائوں پکڑ رہا ہے۔انہوں نے کہا کہ جس کی فطرت میں ڈنک مارنا ہو اس سانپ کو دودھ پلانے کی ضرورت نہیں، جس نے اپنے ہر محسن سے غداری کی اس سے مزید ہمدردی کی توقع مت رکھیں، جب سے اس کا منہ بند ہے ملک کا ہر شعبہ ترقی کی طرف بڑھ رہا ہے۔عظمی ٰبخاری نے کہا کہ اس کی بہن اور بیوی اس کے جیل میں رہنے کے سب سے بڑے بینفشری ہیں، اس کی پارٹی کے لوگ خود نہیں چاہتے یہ جیل سے باہر آئے۔