کرم امن معاہدہ:دو دیہات میں قائم مورچوں کو مسمار کرنا شروع کردیا گیا

کوہاٹ(این این آئی)قبائلی ضلع کرم میں امن معاہدہ کے تحت مقامی انتظامیہ نے لوئر کرم کے دو دیہات بالش خیل اور خار کلی میں قائم مورچوں کو مسمار کرنا شروع کردیا اس مقصد کیلئے ڈپٹی کمشنر کرم اشفاق خان نے اسسٹنٹ کمشنرز اپر کرم افراسیاب اور اسسٹنٹ کمشنر لوئر کرم حفیظ الرحمٰن کی سربراہی میں12سرکاری اہلکاروں پرمشتمل دو الگ الگ ٹیمیں تشکیل دے کر لوئر کرم کے دونوں دیہات بالش خیل اور خار کلی میں قائم بالترتیب مورچوں کو مسمارکرنا شروع کردیا ہے۔ علاوہ ازیں ڈپٹی کمشنر کرم نے اپر اور لوئر کرم میں محکمہ مواصلات و تعمیرات کے ایگزیکٹیو انجینئرز سے مورچوں کی مسماری کیلئے تیکینکی عملہ سمیت متعلقہ مشینری فراہم کرنے کی ہدایت بھی کی تھی۔دریں اثناء امن معاہدہ کے تحت مورچوں کی مسماری پربعض مقامی لوگوں نے ردعمل کا اظہار کرتے ہوئے اسے امن لانے کے لئے مثبت اقدام قراردیا ہے جبکہ بعض لوگوں نے اس خدشہ کا اظہار بھی کیا ہے کہ صرف بنکرز کی مسماری سے امن لایا نہیں جاسکتا بلکہ اسلحہ کا خاتمہ ضروری ہے۔ادھر لوئر کرم میں گزشتہ 21 روزسے مندوری کے مقام پر بگن اور دیگر دیہات کے لوگوں کا دھرنا جاری ہے جہاں مظاہرین مطالبات کررہے ہیں کہ کرم میں فریقین سے بلاتفریق اسلحہ لیا جائے اور بگن کے نقصانات کا ازالہ کرکے لشکر کشی کرنے والوں کو سزا دی جائے۔ مظاہرین کا مؤقف ہے کہ مطالبات تسلیم ہونے تک دھرنا جاری رہے گا۔ دھرنے کےباعث ٹل پارا چنار روڈ ہنوز بند ہے۔