سیاستدانوں کے غلط رویوں سے پارلیمنٹ بے معنی ہوگئی،فضل الرحمٰن

لاہور (صباح نیوز) جمعیت علمائے اسلام کے سربراہ مولانا فضل الرحمٰن نے کہا ہے کہ سیاستدانوں کے غلط رویوں کی وجہ سے پارلیمنٹ بے معنی ہوگئی۔ لاہور میں میڈیا سے گفتگو کرتے ہوئے انہوں نے کہا کہ سیاستدانوں کو جیلوں میں نہیں ہونا چاہئے۔ اُن کا کہنا تھا کہ سیاستدانوں کے غلط رویوں کی وجہ سے پارلیمنٹ بے معنی ہو گئی۔ خواہش ہے کہ مسائل مذاکرات کے ذریعے ہی حل ہوں۔ انہوں نے کہا کہ ہمارا ہمیشہ یہ تقاضا رہا ہے کہ بھئی آپ آئین کے دائرے میں رہ کر ملک کی خدمت کریں، ملک کے نظام سے وابستہ رہیں، یہ ہمارا میثاق ملی ہے، جب اسکی خلاف ورزی ہوگی تو آئین غیر موثر ہو جائیگا،آئین بے معنی ہو جائیگا جس طرح آج ہم سمجھتے ہیں کہ پارلیمنٹ بے معنی ہو گئی ہے۔ مولانا فضل الرحمٰن نے کہا کہ یہ سب چیزیں ہیں جس پر ہر ادارے نے اپنی حدود سے تجاوز کیا ہے‘ کسی پارٹی نے اپنی حدود سے تجاوز کیا ہے تو اسے اپنے رویئے پر نظر ثانی کرنی چاہئے۔ ایک سوال پر سربراہ جے یو آئی (ف) نے کہا کہ میں سیاسی آدمی ہوں اور مذاکرات کا قائل ہوں اور مذاکرات سے ہی معاملات ٹھیک ہوتے ہیں‘ مذاکرات کی کامیابی کیلئے وہ ماحول بھی ہونا چاہئے جس میں اسکی امید کی جا سکے۔ مجھے پی ٹی آئی کے مطالبات کا معلوم نہیں، خواہش ہے کہ مسائل مذاکرات کے ذریعے ہی حل ہوں۔