مراکش میں بھی کشتی حادثہ، 44 پاکستانیوں سمیت 50 تارکین وطن جاں بحق

اسلام آباد (فاروق اقدس) مغربی افریقہ کے راستے غیر قانونی طور پرسپین جانیوالی کشتی مراکش میں حادثے کا شکار ہوگئی جس کے نتیجے میں 50 افراد جاں بحق ہوگئےجن میں 44 پاکستانی بھی شامل ہیں، غیر ملکی خبررساں اداروں کے مطابق تارکین وطن کے حقوق کیلئے کام کرنیوالی تنظیم واکنگ بارڈرز نے کہا ہے کہ مغربی افریقہ سے کشتی کے ذریعےسپین پہنچنے کی کوشش کے دوران 50 تارکین وطن ڈوب کر ہلاک ہوگئےمراکش کے حکام کا کہنا ہے کہ 36 افراد کو بچایا گیا ہے کشتی 2 جنوری کو افریقی ملک موریطانیہ سے روانہ ہوئی تھی اور اس میں 86 تارکین وطن سوار تھے جن میں 66 پاکستانی بھی شامل تھے، انسانی حقوق کی تنظیم کے مطابق 6 روز قبل تمام ممالک کے حکام کو لاپتہ کشتی کے بارے میں آگاہ کردیا تھا سمندر میں گم ہونیوالے تارکین وطن کیلئےہنگامی فون لائن فراہم کرنیوالی ایک غیر سرکاری تنظیم الارم فون نے 12 جنوری کوسپین کی میری ٹائم ریسکیو سروس کو الرٹ کیا گیاتھا، کینری جزائر کے علاقائی رہنما فرنینڈو نےسپین اور یورپ پر زور دیا کہ وہ مزید سانحات کی روک تھام کیلئے ہنگامی اقدامات کریں بحر اوقیانوس کو افریقہ کا قبرستان نہیں بنایا جاسکتا اور اس سے منہ نہیں موڑا جاسکتا، واکنگ بارڈرز کی سی ای او ہیلینا مالینو نے ایکس پر اپنی پوسٹ میں کہا ڈوبنے والوں میں سے 44 کا تعلق پاکستان سے تھا جنہوں نے گزشتہ 13 دن اذیت میں گزارے لیکن کوئی انہیں بچانے کیلئے نہیں آیا۔