PTIکا مسلسل آٹھویں روز بھی اسمبلی میں احتجاج ،ایجنڈا پھاڑدیا

اسلام آ باد ( رانا غلام قادر ) پی ٹی آئی ممبران قومی اسمبلی نے مسلسل آٹھویں روز بھی ایوان میںاحتجاج جاری رکھا ، نعرے بازی کی اور ایجنڈاپھاڑ کر پرزے پرزے کردیا۔قومی اسمبلی کا اجلاس بدھ کے روز اسپیکر ایاز صادق کی زیر صدارت 14 منٹ کی تاخیر سے شروع ہوا۔سپیکر نے وقفہ سوالات کی کا رروائی شروع کی تو اس دوران اپوزیشن لیڈر عمر ایوب خان نے پوائنٹ آف آرڈر مانگا۔سپیکر نے کہا کہ فیصلہ ہو چکا ، وقفہ سوالات میں پوائنٹ آف آرڈر نہیں ہوگا،اب میںنے یو ٹرن نہیں لینا۔ عمر ایوب نے کہا اپو زیشن کو بات کرنے کا موقع دیں۔ اسپیکر نے کہا کہ آپ کو موقع ملے گا لیکن آپ لوگ سیریس ہوں تو موقع ملے۔پوائنٹ آف آرڈر نہ ملنے پر پی ٹی آئی نے احتجاج شروع کردیا،ڈیسک پر کاپیاں مار کر شور شرابہ کیا۔شیر افضل مروت اسپیکر سے بات کرنے اسپیکر ڈائس کے پاس پہنچ گئے۔اپوزیشن ارکان نے احتجاج کے دوران اووو اووو کی آوازیں نکالیں ۔اپوزیشن کی جانب سے نعرے بازی کی گئی۔