دھاندلی الزامات مسترد ، پتن کی رپورٹ اداروں کو بدنام کرنیکی سازش، الیکشن کمیشن

اسلام آباد ( نمائندہ خصوصی) الیکشن کمیشن نے پتن کی جانب سے جاری کردہ رپورٹ پر ردعمل میں گزشتہ انتخابات میں ہیرا پھیری، جبر اور دھاندلی کے الزامات کو مسترد کرتے ہوئے انہیں ملکی اداروں کو بدنام کرنے کی سازش قرار دیدیا ، کسی کے پاس بے ضابطگیوں کا مواد موجود ہے تو امیدواروں، متاثرہ فریقین کو مہیا کریں تاکہ وہ ٹربیونلز کے سامنے پیش کریں ،ترجمان الیکشن کمیشن کے مطابق پتن کے ایک نمائندے کا انٹرویو اورپریس ریلیز سراسر بے بنیاد اور حقائق کے منافی ہے اگر کسی کے پاس بے ضابطگیوں کا اتنا مواد موجود ہے تو وہ متعلقہ امیدواروں اور متاثرہ فریقین کو مہیا کریں تاکہ وہ ٹربیونلز کے سامنے پیش کریں اور پٹیشنز پر قانون کے مطابق درست کارروائی ہوسکے ، اپنے بیان میں ترجمان ای سی پی نے کہا کہ ریٹرننگ افسران سے جو بھی فارم 46، 45 اور47 الیکشن کمیشن کو موصول ہوئے انکو الیکشن کمیشن نے بغیر کسی ردوبدل کے اپنی ویب سائٹ پر آویزاں کیا جو آج تک موجود ہیں اوراس سلسلے میں متاثرہ فریقین نے پٹیشنز قانون کے مطابق الیکشن ٹریبونلز میں دائر کی ہوئی ہیں جن کی سماعت جاری ہے اور کچھ ٹربیونلز نے فریقین کا موقف سننے کے بعد پٹیشنز پر فیصلے بھی کردیئے ہیں ترجمان کا کہنا ہے ووٹرز کا ٹرن آوٹ الیکشن کمیشن کی سالانہ اور پوسٹ الیکشن رپورٹ میں شامل ہے خواتین اور غیر مسلموں کی مخصوص نشستوں کے حوالے سے کسی قسم کا تبصرہ کرنا مناسب نہ ہوگا کیونکہ یہ معاملہ زیر سماعت ہے اور الیکشن کمیشن اس معاملے پر آئین و قانون کے مطابق فیصلہ کریگا ،بیان میں کہا گیا ہے کہ پتن کی رپورٹ ادارے کا مؤقف جانے بغیر شائع کی گئی جس سے ظاہر ہوتا ہے یہ سراسر بے بنیاد اور منگھڑت پروپیگنڈے کا تسلسل ہے ، الیکشن کمیشن اس قسم کے ہتھکنڈوں سے دباؤ میں نہیں آئیگا۔