بشریٰ کی شامل تفتیش ہونے کیلئے عمران سے ملاقات کی شرط مان لی گئی

راولپنڈی (نمائندہ جنگ،ایجنسیاں)سابق وزیراعظم عمران خان کی اہلیہ بشریٰ بی بی کی شامل تفتیش ہونے کیلئے عمران سے ملاقات کی شرط مان لی گئی،عدالت نے بشریٰ بی بی کی بانی پی ٹی آئی اوروکیل بیرسٹر سلمان صفدر سے ملاقات کا حکم دے دیا قبل ازیں بشری بی بی نے 31 مقدمات میں شاملِ تفتیش ہونے سے پہلے بانی پی ٹی آئی اور وکیل سے مشاورت کی شرط رکھ دی ، عدالت نے ایس او پی کے مطابق بشریٰ بی بی کی ملاقات کا حکم دے دیا۔ اڈیالہ جیل میں انسدادِ دہشت گردی عدالت کے جج امجد علی شاہ نے بشریٰ بی بی پر 26 نومبر کے بعد درج 31 مقدمات کی سماعت کی۔ بشریٰ بی بی نے کہا کہ شامل تفتیش ہونے سے قبل بانی پی ٹی آئی اور وکیل سے مشاورت کرنی ہے، مشاورت کے بعد اپنا بیان ریکارڈ کروانے کے لیے تیار ہوں ۔ عدالت نے ایس او پی کے مطابق بشریٰ بی بی کی بانی پی ٹی آئی اور وکیل سے ملاقات کا حکم دے دیا۔ عدالت نے بشریٰ بی بی کی 30 مقدمات میں ضمانت کی درخواستوں پر کل 10فروری تک سماعت ملتوی کر دی، عدالت نے پی ٹی آئی رہنما اور سابق وفاقئ وزیر اعظم خان سواتی کی دو مقدمات میں دائر عبوری ضمانت کی درخواستوں پر نوٹس جاری کر کے پولیس کو گرفتاری سے روکتے ہوئے سرکاری وکیل سے 22فروری کو جواب طلب کرلیا،  دریں اثنا ء پی ٹی آئی کے سابق چیئرمین ،عمران خان نے عدالتی احکامات کے باوجود بشری بی بی سے جیل میں ملاقات نہ کرانے کے معاملہ پر سپریٹنڈنٹ اڈیالہ جیل کے خلاف اسلام آبادہائیکورٹ میں توہین عدالت کی درخواست دائر کردی ،اور موقف اپنا یا کہ ان کی اہلیہ بشری بی بی بھی اڈیالہ جیل میں ہی قید ہے ،28 جنوری کو عدالت نے حکم دیا کہ ایس او پی کے مطابق ملاقات کرائی جائے،عدالتی حکم کے باوجود جیل حکام کی جانب سے عملدرآمد نہیں کیاگیا۔