جب تک کسان خوشحال نہیں ہوگا معیشت کی ترقی ممکن نہیں،ہمایوں اختر خان

تاندلیانوالہ ( نامہ نگار)سابق وفاقی وزیر ہمایوں اختر خان نے کہا ہے کہ حکومت کسان کو استحصال سے بچانے کیلئے مڈل مین کا کردار محدود کرنے کیلئے موثر پالیسی لائے ،جب تک کسان خوشحال نہیں ہوگا معیشت کی ترقی ممکن نہیں لیکن موجودہ حالات میں کسان اضطراب کا شکار ہے ،حلقے کے عوام کے شانہ بشانہ چلیں گے اور انہیں تنہا نہیں چھوڑیں گے ،دیرینہ مسائل سے آگاہ ہیں اور ان کے حل کیلئے سنجیدہ اور بھرپور کاوشیں جاری رکھے ہوئے ہیں۔ ان خیالات کا اظہار انہوں نے حلقہ این اے 97کے طویل دورے کے دوران علاقہ عمائدین اور عوام سے ملاقاتوںمیں گفتگو کرتے ہوئے کیا ۔ ہمایوں اختر خان نے حلقے میں انتقال کر جانے والوں کے عزیز و اقارب سے اظہا تعزیت اور فاتحہ خوانی بھی کی ۔ سابق وفاقی وزیر ہمایوں اختر خان نے کہا کہ علاقے کے لوگوں کو یہ باور کرانا چاہتا ہوں کہ کسی بھی مشکل وقت میں آپ ہمیں اپنے ساتھ کھڑا پائیں گے ، حلقہ این اے 97اور اس طرح کے دیگر پسماندہ ترین علاقوں کی ترقی حکومتوں کی ترجیح ہونی چاہیے ۔ یہاں کی عوام سے وعدہ ہے میں اور میرے ساتھی اپنی ذاتی حیثیت میں حلقے کی فلاح و بہبود کیلئے کوشاں رہیں گے۔ عوام سے بلا تعطل رابطوں کے لئے تاندلیانوالہ، ماموں کانجن اور کنجوانی میں دفاتر کھولے ہیں ، ذاتی حیثیت میں بھی حلقے اور عوام کے مسائل کے حل کیلئے سر گرمیاں کر رہے ہیں اور یہ کسی پر کوئی احسان نہیں ہے ۔ہمایوں اختر خان نے کہا کہ ہمارے پیش نظر صرف عوام کے مسائل کا حل اور ان کی خوشحالی ہے ، ہم نوجوانوں، کسانوں سمیت ہر طبقے کیلئے آواز بلند کررہے ہیں ۔