صدر زرداری آج نیشنل سٹیڈیم کی نئی بلڈنگ کا افتتاح کرینگے

لاہور(اپنے نامہ نگار سے)صدر مملکت آصف علی زرداری آج ( منگل) کے روز نیشنل اسٹیڈیم کی نئی بلڈنگ کا افتتاح کریں گے۔ لاہور کی طرح کراچی میں بھی شائقین کیلئے کنسرٹ اور کرکٹ فینز کیلئے افتتاحی تقریب میں مفت داخلہ رکھا گیا ہے ۔ تقریب میں وزیراعلی سندھ اور میئر کراچی مرتضیٰ وہاب کو بھی مدعو کیا گیا ہے۔نیشنل اسٹیڈیم کی افتتاحی تقریب میں معروف گلوکار علی ظفر، شفت امانت علی اور ساحر علی بگا اپنے فن کا مظاہرہ کریں گے ، لائٹ شو اور آتش بازی کا بھی مظاہرہ کیا جائے گا۔علاوہ ازیں اپنے بیان میں چیئرمین پی سی بی محسن نقوی نے کہا ہے کہ شائقین کرکٹ ایک اور یادگار شام کیلئے تیار ہو جائیں۔پاکستان میں چیمپئنز ٹرافی 2025 19 فروری سے 9 مارچ تک کھیلا جائے گا، لاہور، کراچی اور راولپنڈی میں میچز منعقد ہوں گے۔