مودی کا پاکستانی فضائی حدود میں پھر 41 منٹ تک سفر،خیرسگالی کا پیغام نہ دیا

کراچی( افضل ندیم ڈوگر) بھارتی وزیراعظم نریندر مودی نے پیر کی دوپہر نیودہلی سے فرانس جاتے ہوئے ایک مرتبہ پھر 41 منٹ تک پاکستان کی فضائی حدود میں سفر کیا اور حسب سابق مودی نے پاکستان حکومت یا پاکستانی عوام کیلئے خیر سگالی کا کوئی پیغام نہیں چھوڑا۔ ایوی ایشن ذرائع کے مطابق بھارتی وزیر اعظم نریندر مودی کا خصوصی طیارہ "انڈیا ون" لاہور کے قریب سے پاکستانی فضائی حدود میں داخل ہوا۔ بھارتی وزیراعظم نے شیخوپورہ، حافظ آباد، منڈی بہاوالدین، چکوال اور کوہاٹ پر 34 ہزار فٹ کی بلندی سے لگ بھگ 41 منٹ تک سفر کیا۔ بھارتی ایئرفورس کا بوئنگ 777 طیارہ پارہ چنار سے افغان فضائی حدود میں داخل ہوا۔ افغانستان کی فضائی حدود کئی سالوں سے بند ہے لیکن بھارتی وزیر کو اس سلسلے میں خصوصی اجازت دی جاتی ہے۔