معدنی وسائل سے مالا مال علاقہ ڈاریاڑو بلوچستان کا اٹوٹ انگ ہے‘ سردار اسلم بزنجو

خضدار(نامہ نگار )نیشنل پارٹی کے مرکزی رہنماء و سابق صوبائی وزیر سردار محمد اسلم بزنجو نے یونین کونسل بھلونک کے علاقے ڈاریاڑو (کتےجی قبر )کو سندھ حکومت کی جانب سے سیاحتی مقام قرار دینے کی مذمت کرتے ہوئے کہا ہے کہ ڈاریاڑو بلوچستان کا اٹوٹ انگ ہے بلوچستان کی سرزمین پر کسی بھی دراندازی کی بھرپور انداز میں ہر فورم پر مخالفت کریں گے کوہ کھیتر کے سلسلے میں واقع ڈاریاڑو کی نہ صرف تاریخی اہمیت ہے بلکہ معدنی وسائل سے مالامال علاقہ بھی ہے ڈاریاڑو کے پہاڑوں میں چند سال قبل پاکستان پیٹرولیم نے تیل و گیس کے بڑے ذخائر دریافت کئے 2017 کی مردم شماری کے بعد سندھ حکومت نے ڈاریاڑو کو ضلع قمبر شہداد کوٹ میں شامل کرلیا تھا ایم پی اے کی حیثیت سے اسمبلی میں ڈاریاڑو کے لئے بھرپور آواز بلند کی اور اس کی اہمیت سے بلوچستان اسمبلی کو آگاہ کیا بعد ازاں کرخ کے معتبرین کے ساتھ مل کر سپریم کورٹ گئے عدالت عالیہ نے علاقے کو دوبارہ بلوچستان میں شامل کرنے کے احکامات صادر کئے انہوں نے کہا کہ استحصالی قوتوں نے بلوچستان کے ساحل وسائل کی لوٹ مار کے بعد دوبارہ سے ڈاریاڑو کی سرزمین کو ہتھیانے کے لئے سیاحتی مقام نامزد کرنے کا نوٹیفکشن جاری کیا ہے جس کی ہم بھرپور انداز میں مذمت کرتے ہیں سیاسی پارٹیوں اور علاقائی عمائدین کے ساتھ ملکر اس اقدام کے خلاف بھرپور مزاحمت اور ہر فورم پر آواز بلند کریں گے۔