نقل کے ناسور کا خاتمہ یقینی بنائیں گے‘کمشنر لورالائی ڈویژن

بارکھان(خ ن)کمشنر لورالائی ڈویژن سعادت حسن نے ڈپٹی کمشنر بارکھان وقار خورشید عالم و اسسٹنٹ کمشنر بارکھان خادم حسین بھنگر کے ہمراہ گورنمنٹ گرلز ہائی سکول بارکھان اور گورنمنٹ بوائز ماڈل ہائی سکول بارکھان میں قائم میٹرک کے امتحانی مراکز کا دورہ کیا۔دونوں مراکز میں آج پہلا آرٹ کا پیپر جاری تھا، آپشنل پیپر ہونے کی وجہ سے طلبا کی تعداد بہت کم تھی۔ امتحانی عملہ مراکز میں موجود پایا گیا۔مزید اعلی حکام کی ہدایات پر عملدرآمد کرتے ہوئے ضلعی انتظامیہ نے مراکز میں کلوز سرکٹ ٹیلی ویژن کیمرہ جات نصب کیے تھے۔ سیکورٹی کے مناسب انتظامات بھی تھے۔کمشنر نے امتحانی عملہ سے دستیاب سہولیات کے بارے میں دریافت کیا اور انہیں تاکید کی کہ امتحانی مراکز میں نظم وضبط برقرار رکھیں، مقررہ وقت پر پیپر شروع اور ختم کریں۔ نقل کے ناسور کا خاتمہ یقینی بنائیں۔ بعد ازاں کمشنر نے امیدواروں کے پیپر چیک کئے اور ان کی حوصلہ افزائی کی۔