پنجگور سے 19 کروڑ لوٹنے والے 8ملزمان حب سے گرفتار

کو ئٹہ(نسیم حمید یوسف زئی)کرائم برانچ پولیس نے تین ماہ قبل پنجگور کے بینکوں کے19کروڑ روپے لوٹنے والے گروہ کے آٹھ ملزمان کو حب سے گرفتار کر کے اسلحہ قبضے میں لیا گرفتار ملزمان حب میں بھی بڑی ڈکیتی کا منصوبہ بنا رہے تھے دیگر ساتھیوں کی گرفتاری کے لئے ٹیم چھاپے مار رہی ہے پولیس ذرائع کے مطابق نو دسمبر2024 کونجی سیکورٹی کمپنی کے اہلکار پنجگور کے بینکوں سے 19 کروڑ کی رقم لے کر گاڑی میں کوئٹہ آرہے تھے گاڑی جیسے ہی ناگ کے مقام پر پہنچی تو تین گاڑیوں میں سوار درجن سے زائد مسلح افراد نے اسے روک کر سیکورٹی گارڈز سے اسلحہ چھین کر گاڑی میں رکھی 19 کروڑ کی رقم لوٹ لی اور کمپنی کی گاڑی کو آگ لگا کر موقع سے فرار ہو گئے واقعے کا مقدمہ لیویز تھانہ ناگ میں درج کیا گیا۔ پولیس ذرائع نے بتایا کہ کیس19 دسمبر کو کرائم برانچ بلوچستان منتقل کیا گیا جس پر آئی جی بلوچستان پولیس معظم جاہ انصاری نےڈی آئی جی کرائم برانچ عبدالغفار قیصرانی کو ملزمان کی گرفتاری کا خصوصی ٹاسک دیا ۔ذرائع نے بتایا کہ ڈی آئی جی نے ملزمان کی گرفتاری کے لئے ایک تشکیل دی جس نے جدید ٹیکنالوجی کا استعمال کرتے ہوئے اور انٹیلیجنس نظام کے ذریعے رقم لوٹنے والے ملزمان کا سراغ لگاتے ہوئے گزشتہ روز صنعتی شہر حب میں ایک مکان پر چھاپہ مار کر آٹھ ملزمان عبدالحکیم،محمد اختر،محمد آصف،ریاض احمد،فراز احمد،محمد ذاکر،بہار خان اور ضمیر احمد کو گرفتار کر کے بھاری تعداد میں اسلحہ قبضے میں لے لیا ۔ذرائع نے بتایا ابتدائی تفتیش میں گرفتار ملزمان نے انکشاف کیا ہے کہ وہ حب میں بھی بینکوں سے رقم لے جانے والی گاڑیوں کی ریکی کر رہے تھے اور دو دن بعد بڑی کارروائی کرنے والے تھے ملزمان نے اپنے دیگر ساتھیوں اور لوٹی گئی رقم کی نشا۔ندہی کی ہے ٹیم دیگر ملزمان کی گرفتاری کے لئے چھاپے ما رہی ہے۔