پی ٹی آئی اور بی این پی میں رابطہ، سیاسی حکمت عملی پر تبادلہ خیال

کوئٹہ(پ ر)سابق اسپیکر قومی اسمبلی و سینئر رہنما پی ٹی آئی اسد قیصر کا مرکزی سینئر نائب صدر بلوچستان نیشنل پارٹی ساجد ترین ایڈووکیٹ سے ٹیلیفونک رابطہ ، سیاسی امور پر تبادلہ خیال کیاگیا۔اسد قیصر اور ساجد ترین ایڈووکیٹ نے فارم 47 حکومت کے خلاف مستقبل کی سیاسی حکمت عملی پر تبادلہ خیال کیا۔ دونوں رہنماؤں نے اپوزیشن کے بڑے اتحاد کے ایجنڈے پر اتفاق کیا اور اسد قیصر نے ایڈووکیٹ ساجد ترین سے گفتگو کرتے ہوے کہا کہ بی این پی اور پارٹی قائد سردار اختر جان مینگل سندھ کی قوم پرست جماعتوں کو اس اتحاد میں شامل کرنے میں اپنا کردار ادا کرے۔ بی این پی کے مرکزی سینئر نائب صدر ساجد ترین ایڈووکیٹ نے کہا کہ ہماری پارٹی کا بنیادی ایجنڈا بلوچستان میں لاپتہ افراد کے مسائل کا حل ہے۔ اسٹیبلشمنٹ کو سمجھنا چاہیے کہ طاقت کے ذریعے بلوچستان میں امن نہیں لایا جا سکتا ہم ہر اس سیاسی اتحاد کی حمایت کریں گے جو لاپتہ افراد کے معاملے پر آواز اٹھانے میں ہمارا ساتھ دے۔ اسد قیصر اور ساجد ترین ایڈووکیٹ نے جلد ہی اپوزیشن کے دیگر رہنماؤں کے ساتھ لاپتہ افراد کے معاملے پر اور مختلف سیاسی معاملات پر ملاقات کرنے پر اتفاق کیا۔