دورانِ سروس فوت ہونیوالے سرکاری ملازمین کے ورثاء کیلئے ملازمت کی سہولت ختم

اسلام آباد (رپورٹ حنیف خالد) وفاقی حکومت نے سپریم کورٹ آف پاکستان کے فیصلے کے پیش نظر وزیر اعظم امدادی پیکیج 2015 کے تحت دورانِ ملازمت وفات پانے والے سرکاری ملازمین کے اہل خانہ کو ملازمت دینے کی سہولت ختم کرنے کا اعلان کر دیا ہے۔ فیڈرل بورڈ آف ریونیو (ایف بی آر) کے نوٹیفکیشن کے مطابق یہ اقدام سپریم کورٹ کے 18 اکتوبر 2024 کو سنائے گئے فیصلے کے مطابق کیا گیا ہے۔ تاہم اس فیصلے کا اطلاق ان سرکاری ملازمین پر نہیں ہوگا جو دہشت گردی کی کارروائیوں میں شہید ہوئے ،قانون نافذ کرنے والے اداروں کے شہداء کے قانونی ورثاء بھی بدستور وزیر اعظم امدادی پیکیج کے تحت ملازمت کے حقدار ہوں گے۔ مزید برآں وہ تقرریاں جو پہلے ہی کی جا چکی ہیں ان پر اس فیصلے کا کوئی اثر نہیں ہوگا۔