4 قوانین منظور کرنے کے سوال پر پی پی اور متحدہ میں اختلاف برقرار

اسلام آباد(محمد صالح ظافر/خصوصی تجزیہ نگار)پارلیمنٹ کا مشترکہ اجلاس آئندہ منگل کو منعقد ہوے بغیر تیسری مرتبہ ملتوی ہو جائے گا یہ التوا غیر معینہ مدت کے لئے ہوگا،چار قوانین منظور کرنے کے سوال پر پیپلزپارٹی اور متحدہ کے درمیان سخت اختلاف برقرار ہے قبل ازیں قومی اسمبلی اور سینیٹ سے منظوری کے باوجود صدر مملکت نے توثیق کرنے سے انکار کر دیا تھا اور انہیں واپس قومی اسمبلی کو بھیج دیا تھا،ایوان صدر کا موقف ہے کہ ان قوانین کا تعلق تعلیم سے ہے جو صوبائی دائرہ اختیار ہے،قومی اسمبلی نے مالیاتی بل اور انکم ٹیکس ترمیمی بل مجریہ 2025 سینیٹ کو ارسال کر دیا جہاں تحریک انصاف مزاحمت کرکے سفارشات میں تاخیر پیدا کرنا چاہتی ہے،آئی ایم ایف کی شرائط پورا کرنے کے لئے ان قوانین کو ردوبدل کے بغیر منظور کرنا ضروری ہے حکومت نے آئندہ اوائل ہفتہ منظوری حاصل کرنے کا ارادہ کر لیا ہے،پارلیمنٹ کے دونوں ایوانوں کا مشترکہ اجلاس جو دوسری مرتبہ ملتوی ہونے کےبعد آئندہ منگل (18فروری) کو ہونا تھا اب اسے تیسری مرتبہ غیر معینہ مدت کے لئے ملتوی کئے جانے کا امکان ہے۔