فسادی پہلے سرینڈر پھر رحم کی توقع کریں، ہم کامریڈ کی طرح لڑتے ہیں، فوج کبھی نہیں ہارے گی، آرمی چیف

اسلام آباد (صالح ظافر/ فاروق اقدس) آرمی چیف جنرل عاصم منیر نے کہا ہے کہ فسادی پہلے سرینڈر پھر رحم کی توقع کریں،ہم کامریڈ کی طرح لڑتے ہیں، جب تک قوم اور بالخصوص نوجوان ساتھ کھڑے ہیں پاک فوج کبھی نہیں ہارے گی، ہم فتنہ الخوارج کےفسادیوں سے لڑ رہے ہیں،اسلام کی غلط تشریح کرنے والے گمراہ کن گروہ کو کبھی ملک پر اپنی اقدار مسلط نہیں کرنے دینگے، انہوں نے فتنہ خوارج کو مخاطب کرتے ہوئے کہا کہ عورت کو سب سے زیادہ عزت اسلام نے دی تو آج اسے چھیننے والے تم کون ہوتے ہو؟ تمہیں یہ اختیار کس نے دیا؟ ۔ آرمی چیف جنرل سید عاصم منیر نے یہ گفتگو 12 فروری کو ملک بھر کی جامعات سے آئے طلبہ سے خطاب کرتے ہوئے کہی جس کا 3 منٹ 10 سیکنڈ کا کلپ آئی ایس پی آر کی جانب سے جاری کیا گیا۔ بری فوج کے سربراہ جنرل سید عاصم منیرنے واشگاف طور پر اعلان کیا ہے کہ مذہب اسلام نےخواتین کو زیادہ سے زیادہ توقیر عطاکی ہے گمراہی کی سوچ کے حامل رکنی گروہ کو اسے چھیننے نہیں دینگے۔ جب تک قوم اور باالخصوص نوجوان پاک فوج کے پیچھے کھڑے ہیں اور ہمارے اندر قربانی کا جذبہ موجزن ہے فوج کو کبھی ہزیمت کاسامنا نہیں کرنا پڑے گا۔ وہ اتوار کو ملک کے مختلف علاقوں سے طلبا اور طالبات کے اجتماع سے خطاب کررہے تھے جس میں انہوں نے قرآن حکیم کی آیات کا ان کی حرف و نحو کے عین مطابق تلاوت کرکے ترجمہ فی البدیہہ پیش کیا جن میں فتنہ الخوارج کی حقیقت بیان کی گئی ہے اور ان کے لئے وعید صادر کی گئی ہے۔ جنرل سید عاصم منیر پاکستان کی مسلح افواج کے پہلے سربراہ ہیں جو نہ صرف حافظ قرآن ہیں بلکہ انہوں نے حفظ قرآن کی سعادت مکہ مکرمہ میں خانہ کعبہ کے بابرکت سائے میں حاصل کی جہاں وہ بطور کرنل پاکستان کی مسلح افواج کی نیابت کے گرانقدر منصب پر ذمہ داریاں ادا کررہے تھے۔ کرنل بن جانے کے بعد کی عمر میں قرآن حکیم کی ہر آیات کو یاد کرلینا بھی اللہ تعالی کے خصوصی طفل و کرم کے بغیر ممکن نہیں۔ وہ دینی شعائر کی بجا آوری میں کسی بھی فرض کی ادائیگی میں مصروف ہوں کوتاہی سے گریز کرتے ہیں۔ طلبا اور طالبات نے ان کے خطاب کے دوران بار بار اور تادیر تالیاں بجا کر ان کی گفتگو کے لئے اپنا خراج پیش کیا۔ جنرل سید حافظ عاصم منیر نے کہا کہ ملک کے نوجوانوں سے جب بھی گفتگو ہوتی ہے وہ ان کے لئے انتہائی خوشی کا باعث بنتی ہے نوجوانوں کا جوش و خروش اور جذبہ اس امر کا غماز ہے کہ ملک محفوظ ہاتھوں میں ہے جب تک قوم پاک فوج کی پشت پر کھڑی ہے خصوصاً نوجوان اس کے پشتبان ہیں اور جب تک ہمارے اندر قربانی کا جذبہ زندہ اور موجزن ہے پاکستان کی فوج کو کبھی ہزیمت کاسامنا نہیں ہوگا۔ انہوں نے مسلح افواج کی صفوں میں بے مثال یک جہتی کاحوالہ دیتے ہوئے کہا کہ ہم فوج میں یمین ویسار بن کرلڑتے ہیں جنرل عاصم نے اس کے لئے کامریڈ کی اصطلاح استعمال کی اور کہا کہ پاک فوج کی یہی خوبصورتی ہے کہ ہم ایک ساتھ بیٹھتے اور دشمن سے لڑتے ہیں ہمیں کوئی علم نہیں ہوتا کہ کون پختون، کون سندھی، کون بلوچی اور کون پنجابی یا پٹھان ہے اس پر ملک بھر کی جامعات سے آئے طلبا نے زوردار تالیاں بجائیں ا ن کا کہنا تھاکہ یہ پاکستانیت ہی ہمارے لئے کافی ہے ہم سب پاکستانی ہیں اور پاکستان سے محبت کرتے ہیں آج پاکستانی فوج اور ہم فسادیوں سے لڑ رہے ہیں وہ فتنہ الخوارج کے ساتھ جنگ کررہے ہیں جو سمجھتے ہیں کہ وہ جہاد کررہے ہیں حالانکہ درحقیقت وہ دین سے ہی خارج ہوچکے ہیں کیونکہ ان کے پاس اسلام کی اپنی اور سراسر غلط تشریح ہے جواسلام میںجائز ہی نہیں اور نہ ہی اس کی اجازت ہے۔ اللہ تعالی نے ان کے لئےحکم صادر فرما رکھا ہے قرآن حکیم میں اللہ تعالی نے ان کے بارے میں کہہ دیا ہے کہ یہ اللہ تعالی اور اس کے رسول کریم ؐ کے خلاف جنگ کررہے ہیں یہ زمین پر فساد برپا کررہےہیں ان کے لئے سزا ہے کہ انہیں قتل کردیا جائے انہیں پھانسی پر لٹکادیا جائے (صلیب پر چڑھادیا جائے) یا ان کے ہاتھ اور پائوں مختلف سمتوں سے کاٹ دو یا انہیں زمین سے نکال دو (دربدر کردو) یہ دنیا میں ان کے لئے سزا ہے اور آخرت میں ان کے لئے اس سے کہیں زیادہ کڑی سزا ہے۔ جو اس سے پچنا چاہتے ہیں اللہ تعالی نے ان کے لئے صرف ایک گنجائش رکھی ہےکہ اس سے پہلے تم انہیں پکڑلو اس سے پہلے کہ وہ تائب ہوجائیں اور ریاست کےسامنے سرنگوں (ہتھیار ڈال دیں) ہوجائیں۔ پھر انہیں پتہ ہونا چاہئے اللہ تعالی انتہائی رحم کرنے اور انتہائی معافی کرنے (غفور و الرحیم) والا ہے۔ جنرل سید عاصم منیرنے کہا کہ خوارجیوں کو اپنے لئے معافی کا طلبگار ہونا چاہئے اور ریاست کے سامنے ہتھیار ڈال دینا چاہئے، جس کے بعد ہی وہ ریاست سے رحم کی توقع کرسکتے ہیں۔ یہ وہ ہیں جن کے خلاف فوج بدستور جنگ آزما ہے وہ آج فتنہ الخوارج کے خلاف روزانہ کی بنیاد پر لڑ رہی ہے۔ جنرل سید عاصم منیر نے قرآنی آیات رک رک کر پیش کیں اور ہر آیت کا الگ الگ ترجمہ بھی کرکے سنایا۔ بری فوج کے سربراہ نےواضح کیا کہ ہم اسلام کے بارے میں خارجیوں کی تشریح سے اتفاق نہیں کرتے اور نہ ہی اسے مسلط ہونے دینگے انہوں نے یاد دلایا کہ اسلام دنیا کا اولین مذہب ہے جس نےخواتین کے مرتبے کو نئی بلندیاں عطا کی ہیں عورت کوآسمان کی وسعتوں تک پہنچایا ہے چاہے وہ ماں ہو، بیوی ہو یا بہن، اس کا کوئی بھی کردار ہو اسلام نے انہیں زیادہ سے زیادہ عزت عطا فرمائی ہے۔ جنرل سید عاصم منیرنے فتنہ الخوارج سے مخاطب ہو کر کہا کہ تم کون ہوتے ہو جو خواتین کو ان کے مرتبے سے محروم کرنےوالے، تمہیں یہ اختیار کس نے دیا ہے، خواتین سے اسلام کاعطا کردہ مقام کوئی نہیں چھین سکتا ہم اس قسم کے گمراہ گروہ کوکبھی بھی اپنے ملک پر ان کی آلودہ سوچ کو مسلط نہیں ہونے دیں گے۔ انہوں نےواضح کیا کہ خیبرپختواخوا اور بلوچستان کے عوام ان کے ارادوں کے سامنے آہنی دیوار بنے کھڑے ہیں۔ جنرل سید عاصم منیر کے متاثرکن خطاب پر طلبا اور طالبات بار بار والہانہ تالیاں بجا کر اپنے جذبات اور اپنی تحسین ظاہر کرتے رہے۔