’آسمان سے گرا کھجور میں اٹکا‘ امریکی خاتون اونیجا اینڈریو رابنسن پر دبئی میں نئی مشکل

کراچی (افضل ندیم ڈوگر) ’آسمان سے گرا کھجور میں اٹکا ‘ کی مثال پاکستانی لڑکے کی محبت میں مبتلا امریکی خاتون اونیخا اینڈریو رابنسن پر فٹ بیٹھ رہی ہے جسے دبئی میں حفاظتی تحویل میں لے لیا گیا ہے۔ اونیجا اینڈریو رابنسن 7 فروری کی رات کراچی سے پرواز ای کے 603 سے دبئی پہنچی تھی۔ خاتون نے دبئی سے پرواز ای کے 203 سے نیویارک جانا تھا مگر خاتون نے یہ پرواز چھوڑ دی تھی۔ اونیجا امریکی شہری ہونے کی وجہ سے آن ارائیول ویزے پر دبئی میں چلی گئی تھی۔ ذرائع کے مطابق اس کی فیملی اور ادارے کے لوگ نیویارک میں اونیجا کے پہنچنے کا انتظار کر رہے تھے مگر وہ نہیں پہنچی تو امریکی حکام کی جانب سے خاتون کی تلاش شروع کی گئی۔ ذرائع کے مطابق دبئی کی سڑکوں پر ویڈیوز سامنے آنے پر امریکی ادارے حرکت میں آئے اور امارات اتھارٹیز سے رابطہ کیا۔ جس پر خاتون کی آمدورفت محدود کرکے اسے حراست میں لے لیا گیا۔ ذرائع کے مطابق اب اونیجا رابسن کو دبئی سے امریکہ بھیجنا پھر مسئلہ بن رہا ہے کیونکہ خاتون نے کوئی قانونی خلاف ورزی نہیں کی وہ وزٹ ویزا پر ہے اسے زبردستی نہیں بھیجا جا سکتا کسی وجہ سے اگر خاتون کو دبئی سے ڈی پورٹ بھی کیا جائے تو کوئی ایئر لائن یا پائلٹ اس ابنارمل خاتون کو سیکیورٹی وجوہات کی بنا پر 15 گھنٹے طویل پرواز میں لے جانے پر آمادہ نہیں۔ ممکنہ طور پر خاتون کو اگلے سفر کیلئے راضی کرکے ہی امریکہ بھیجا جا سکتا ہے۔