رمضان تمباکو نوشی سے چھٹکارے کا بہترین موقع ہے ، ڈاکٹر کامران

کراچی (بابر علی اعوان /اسٹاف رپورٹر) جناح اسپتال کے شعبہ امراض سینہ کے ڈاکٹر کامران خان نے کہا ہے کہ رمضان المبارک کا بابرکت مہینہ تمباکو نوشی سے چھٹکارا حاصل کرنے کا بہترین موقع فراہم کرتا ہے ،سگریٹ میں کیمیکل نیکوٹین استعمال کیا جاتا ہے ، یہ ہیروئن سے زیادہ نشہ آور ہے، جنگ سے گفتگو کرتے ہوئے انہوں نے کہا کہ کراچی میں 18 سال کی عمر کے لڑکے فیشن کے طور پر تمباکو نوشی کرتے ہیں جو ایک خطر ناک عادت ہے جو زندگی کے کئی قیمتی سال کم کر دیتی ہے۔ تمباکو نوشی سے پھیپھڑوں کے کینسر سمیت دائمی کھانسی، پھیپھڑوں کا پھول جانا، دمہ کے امکانات بڑھنا، سینے کا انفیکشن ہونا، دل کا دورہ پڑنا، فالج کے امکانات بڑھنا، کھانے کی نالی کا کینسر، لبلبے کا کینسر، خون کا کینسر، ہڈیوں کے بھربھرے پن کے امکانات، وقت سے پہلے آنکھوں میں سفید موتیا ہوجانا، بچوں میں انفیکشن، دمے کے امکانات اور کان کا انفیکشن و دیگر بیماریاں ہوجاتی ہیں۔ دنیا بھر میں سگریٹ بہت مہنگی ہے لیکن پاکستان میں یہ نہ صرف سستی ہے بلکہ کھلی بھی مل جاتی ہے جسے بچے بھی آسانی سے خرید لیتے ہیں جسے روکنے کےلئے حکومت کو سنجیدہ اقدامات کی ضرور ت ہے۔