نہروں کا معاملہ: اتفاق ضروری

صوبہ پنجاب میں واقع چولستان کے صحرائی علاقے میں کاشتکاری کیلئے خصوصی سرمایہ کاری سہولت کونسل کے زیر اہتمام دریائے سندھ سے نہریں نکالنے کے پروگرام پر اس معاملے کے آغاز ہی سے سندھ کے سیاسی اور عوامی حلقے سنجیدہ خدشات کا اظہار کررہے ہیں۔ صدر مملکت نے پارلیمنٹ کے مشترکہ اجلاس میں بھی اس حوالے سے تشویش ظاہر کی۔ان کا کہنا تھا وفاقی اکائیوں کی شدید مخالفت کے باوجود حکومت کا دریائے سندھ کے نظام سے مزید نہریں نکالنے کافیصلہ یکطرفہ ہے، بحیثیت صدر اس کی حمایت نہیں کر سکتا، حکومت سے درخواست کرتا ہوں کہ تمام اسٹیک ہولڈرز کے ساتھ مل کر کام کرے۔ دوسری جانب پاکستان پیپلز پارٹی کے چیئرمین بلاول بھٹو نے گزشتہ روز میڈیا سے گفتگو کرتے ہوئے دریائے سندھ سے نہریں نکالنے کو صوبے کے عوام کیلئے زندگی اور موت کا معاملہ قرار دیا۔ ان کا مؤقف تھا کہ اس بارے میں مشترکہ مفادات کونسل میں متفقہ فیصلہ ہونا چاہیے۔پانی کے معاملے پر پیپلز پارٹی کی خاموشی کے بیانیہ کو سفید جھوٹ قرار دیتے ہوئے انہوں نے کہا کہ جو سیاستداں اس مسئلے پر غلط فہمی پیدا کر رہے ہیں، وہ اسے متنازعہ بنانے کی کوشش کر رہے ہیں۔تاہم یہ بات اطمینان بخش ہے کہ وزیر اعظم نے ایک دن پہلے پیپلز پارٹی کے وفد سے ملاقات میں نہروں کے معاملے کو اتفاق رائے سے طے کرنے اور اس سمیت پیپلز پارٹی کی تمام شکایات دور کرنے کیلئے اعلیٰ سطحی اجلاس جلد بلانے کی یقین دہانی کرائی ہے جس میں دونوں حکمراں جماعتوں کے رہنما بھی شریک ہوں گے اورنہروں اور دوسرے امور خصوصاً پنجاب میں پیپلزپارٹی کو لاحق شکایات پر فیصلے مشاورت سے کیے جائیں گے۔ امید ہے کہ یہ اجلاس مثبت نتائج کا سبب بنے گاتاہم سیاسی نظام کے پائیدار استحکام کیلئے حکومت کو تمام فیصلے مستقل طور پر اتحادی جماعتوںکو اعتماد میں لے کر ہی کرنے چاہئیں تاکہ کوئی ناخوشگوار صورت حال پیدا ہی نہ ہو۔