بھارتی میڈیا، BLAاور PTIٹرین واقعے پریک زبان تھے، عطاتارڑ

کراچی (ٹی وی رپورٹ) وفاقی وزیر اطلاعات و نشریات عطا تارڑ نے کہا ہے کہ آپریشن شروع ہونے سے پہلے21 مسافر شہید ہوچکے تھے، کل440 مسافر ٹرین پر سوار تھے،جن میں سے بہت سے مسافروں کو مغوی رکھا گیا، واقعے میں4 ایف سی اہلکار شہید ہوئے۔33 دہشت گردوں کو جہنم واصل کیا گیا ہے، بھارتی میڈیا، بی ایل اے اور پی ٹی آئی اس واقعے پریک زبان تھے، کچھ سیاسی عناصر نے واقعہ کو سیاست چمکانے کیلئے استعمال کیا، کالعدم بی ایل اے، بھارتی میڈیا اور پی ٹی آئی نے جھوٹا پروپیگنڈا کیا، جب تک دہشت گردی کا خاتمہ نہیں ہو جاتا، ہم چین سے نہیں بیٹھیں گے۔ ان خیالات کا اظہار انہوں نے جیو نیوز کے پروگرام ’’آج شاہزیب خانزادہ کیساتھ‘‘ میں میزبان سے گفتگو کرتے ہوئے کیا۔ عطا تارڑ نے کہا اسنائپرز نے خود کش بمباروں کو ہلاک کیاتو مغوی مسافر نکلنے میں کامیاب ہوئے،جدید ٹیکنالوجی کا بھی استعمال کیا گیا۔ فوج کی پیشہ ورانہ مہارت کی بدولت ہم بہت بڑے سانحہ سے بچے۔ وزیراعظم شہباز شریف کل کوئٹہ جائیں گے ،وہاں حکومت عملی کا اعلان کرینگے۔عمر ایوب کو انٹیلی جنس ایجنسی کے بارے میں بات کرتے ہوئے سوچنا چاہئے تھا۔دہشت گردوں نے اس ایریا میں ٹارگٹ کیاجہاں پر لیویز کا ایریا ہے ۔ یہ ہائی سیکورٹی والا ایریا نہیں تھا۔ان کے تانے بانے کہاں سے ملتے ہیں اورسپورٹ ملتی ہے سارا ڈیٹا ہمارے پاس ہے۔ان کو اب چھپنے کی جگہ نہیں ملے گی۔ یہ ان کی آخری کارروائی ہے۔ میزبان شاہزیب خانزادہ نے کہاڈاکٹر ادیب رضوی کا قائم کردہ ادارہ کسی تعارف کا محتاج نہیں۔3 کروڑ50 لاکھ سے زائد مریض استفادہ کرچکے ہیں۔ ایس آئی یو ٹی کو ہمارے تعاون کی ضرورت ہے۔