پاکستان اور IMF کا ٹیکس ہدف کم اور مالیاتی فریم ورک نظرثانی پراتفاق

اسلام آباد ( مہتاب حیدر): پاکستان اور آئی ایم ایف نے موجودہ مالی سال کے لیے میکرو اکنامک اور مالیاتی فریم ورک کو نیچے کی جانب نظر ثانی کرنے پر اتفاق کر لیا ہے، جس کے تحت ایف بی آر کے سالانہ ٹیکس وصولی کے ہدف کو 12.97 ٹریلین روپے سے کم کرکے 12.35 ٹریلین روپے کر دیا گیا ہے۔ٹیکس سے جی ڈی پی تناسب کے 10.6 فیصد کے ہدف میں کوئی تبدیلی کیے بغیر، ایف بی آر کے سالانہ ٹیکس وصولی کے ہدف میں 0.62 ٹریلین روپے کی کمی کی گئی ہے۔ایف بی آر کو پہلے ہی رواں مالی سال کے ابتدائی آٹھ ماہ میں 0.6 ٹریلین روپے کے ریونیو شارٹ فال کا سامنا تھا، اور اب باقی چار ماہ (مارچ تا جون) کی مدت میں ماہانہ بنیادوں پر ایڈجسٹمنٹ کی جائے گی۔دوسری جانب، آئی ایم ایف نے وزارت خزانہ کے لیے لازم اور ضروری قرار دیا ہے کہ وہ اخراجات کو متناسب طور پر ایڈجسٹ کرے تاکہ موجودہ مالی سال کے لیے 2.4 ٹریلین روپے کے بنیادی سرپلس کے ہدف کو حاصل کیا جا سکے، جو سالانہ ٹیکس وصولی کے نظر ثانی شدہ ہدف کے پیش نظر طے کیا گیا ہے۔وزارت خزانہ تحریری طور پر اس بات کی ضمانت دے گی کہ اخراجات کو کم شدہ ٹیکس وصولی کے ہدف کے مطابق ایڈجسٹ کیا جائے گا، ایک اعلیٰ عہدیدار نے بتایا۔"کوئی منی بجٹ نہیں آئے گا، اور ہم نے ایف بی آر کو اس بات پر قائل کیا ہے کہ ہمارا ہدف نامیاتی شرح نمو میں نیچے کی جانب نظر ثانی کے مطابق ایڈجسٹ کیا جائے۔ معیشت کا حجم اب 123 ٹریلین روپے سے کم کر کے 116.5 ٹریلین روپے کر دیا گیا ہے، لہٰذا 10.6 فیصد ٹیکس سے جی ڈی پی تناسب کا مطلب ہے کہ ایف بی آر کا ٹیکس وصولی کا ہدف 12.35 ٹریلین روپے ہوگا،" آئی ایم ایف سے مذاکرات میں شامل اعلیٰ عہدیداروں نے جمعرات کی شب "دی نیوز" سے بات کرتے ہوئے انکشاف کیا ۔پاکستان اور آئی ایم ایف 7 ارب ڈالر کے توسیعی فنڈ سہولت (EFF) کے تحت پہلے جائزے کی تکمیل کے لیے مذاکرات کر رہے ہیں، اور پالیسی سطح پر بات چیت جمعہ (آج) کو مکمل ہونے کی توقع ہے۔ دونوں فریق اگلے بجٹ کے فریم ورک کو حتمی شکل دینے کے لیے ورچوئل مذاکرات کریں گے یا آئی ایم ایف مئی 2025 کے اوائل میں ایک چھوٹا مشن بھیج سکتا ہے تاکہ 2025-26 کے بجٹ کے اعداد و شمار کو حتمی شکل دی جا سکے۔