ہندوتوا والوں نے ہولی کو اقلیتوں کیلئے خوف کا ذریعہ بنا دیا‘ محبوبہ مفتی

سری نگر (کے پی آئی) مقبوضہ جموں و کشمیر میں پیپلز ڈیموکریٹک پارٹی (پی ڈی پی) کی سربراہ محبوبہ مفتی نے کہا ہے کہ ہندو توا تنظیموں نے اقتدار میں رہنے والوں کی مکمل حمایت و تائید سے ہولی کے تہوار کو اقلیتوں بالخصوص مسلمانوں کیلئے خوف کا باعث بنا دیا ہے۔ محبوبہ مفتی نے ایکس پر ایک پوسٹ میں کہا کہ یہ بھارت کے جاگنے کا وقت ہے، ہندوؤں اور مسلمانوں کو ایک دوسرے کے خلاف کھڑا کرنے کے خطرناک نتائج ہو سکتے ہیں۔ یاد رہے کہ ہندو انتہا پسندوں نے اترپردیش کے شاہجہاں پور میں ساٹھ سے زائد مساجد کو ہولی سے قبل ترپال کی چادروں سے ڈھانپ دیا تھا۔ مختلف علاقوں میں ہندو توا غنڈوں کی طرف سے مسلمانوں پر زبردستی رنگ پھینکنے کے کئی واقعات پیش آئے۔