ائیر پورٹ خود کش بم دھماکہ کیس ، ملزمہ گل نساء کی درخواست ضمانت پر دلائل مکمل ،فیصلہ محفوظ

کراچی( اسٹاف رپورٹر) انسداد دہشت گردی کی خصوصی عدالت نے ائیر پورٹ خود کش بم دھماکہ کیس میں ملزمہ مسمات گل نساء کی درخواست ضمانت پر دلائل مکمل ہونے پر فیصلہ محفوظ کرلیا۔ انسداد دہشت گردی کی خصوصی عدالت میں ائیر پورٹ خود کش بم دھماکہ کیس میں ملزمہ مسمات گل نساء کی درخواست ضمانت کی سماعت ہوئی ۔ پراسیکیویشن کی جانب سے موقف اختیار کیا گیا کہ ملزمہ گل نساء پر دھماکے میں سہولت کاری کا الزام ہے، ملزمہ نے خود کش حملہ آوار شاہ فہد اور شریک ملزم جاوید کو اپنے گھر میں ٹھہرایا تھا، ملزمہ خود کش حملہ آور کے ساتھ بلوچستان حب سے کراچی سندھ میں داخل ہوئی تھی۔ ملزمہ کے وکیل کی جانب سے موقف اختیار کیا گیا کہ ملزمان کو کیسے پتہ چلا کہ غیر ملکی آرہے ہیں یہ سیکورٹی اور انٹیلی جنس لیپس ہے ،سیکورٹی لیپس کے بارے میں کوئی تحقیقات پولیس نے کی ہیں ؟ ملزمہ کا کالعدم تنظیم سے کوئی تعلق نہیں بنتا ہے۔