پاک بحریہ کی دوسری ہنگور کلاس آبدوز پی این ایس شوشک کی چین میں لانچنگ تقریب

راولپنڈی ( رپورٹ حنیف خالد)چین میں پاک بحریہ کی دوسری ہنگور کلاس آبدوز پی این ایس شوشک (SHUSHUK)کی لانچنگ تقریب کا انعقاد کیا گیا ۔وائس چیف آف دی نیول اسٹاف وائس ایڈمرل اویس احمد بلگرامی تقریب کے مہمان خصوصی تھے انہوں نے کہا کہ معاہدے کے تحت 4 آبدوزیں چین میں اور 4کراچی شپ یارڈ میں تعمیر کی جائینگی۔لانچنگ تقریب میں پاکستان اور چین کے اعلیٰ حکام نے شرکت کی ۔وائس ایڈمرل اویس احمد بلگرامی نے میری ٹائم سیکیورٹی کی اہمیت، قومی مفادات کے تحفظ اور سازگار بحری ماحول کے لئے پاک بحریہ کے کردار پر روشنی ڈالی۔ انہوں نے کہا کہ حکومت پاکستان نے چینی صدر کے دورہ پاکستان کے دوران چین کے ساتھ 8ہنگور کلاس آبدوزوں کے حصول کے معاہدے پر دستخط کئے تھے۔ معاہدے کے تحت 4 آبدوزیں چین میں اور 4 کراچی شپ یارڈ میں ٹرانسفر آف ٹیکنالوجی کے تحت تعمیر کی جائیں گی۔