جسٹس تصدق جیلانی کیلئے ڈیوک یونیورسٹی کا 2025بولچ پرائز قانون کی حکمرانی

اسلام آباد (رپورٹ: حنیف خالد)ڈیوک لا اسکول کے بولچ (Bolch) جوڈیشل انسٹیٹیوٹ کی جانب سے سابق چیف جسٹس آف پاکستان جسٹس تصدق حسین جیلانی کو 2025کا بولچ پرائز برائے قانون کی حکمرانی سے نوازا گیا۔ اس موقع پر انہوں نے ایک پراثر اور بصیرت افروز تقریر کی، جس میں عالمی سطح پر مذہبی انتہاپسندی، نسل کشی اور اقلیتوں پر مظالم پر شدید تشویش کا اظہار،قانون، انصاف، مذہبی رواداری اور انسانی حقوق سے متعلق عالمی و ملکی تناظر میں اپنے خیالات کا اظہار کیا۔ انہوں نے کہا کہ یہ ایوارڈ ان کے لیے عاجزی اور شکرگزاری کا لمحہ ہے، اور یہ ان اعلیٰ اخلاقی اقدار کی نمائندگی کرتا ہے جو دنیا بھر میں قانون کی حکمرانی، انسانی وقار، آزادی اور رواداری کو فروغ دینے کے لیے ناگزیر ہیں۔انہوں نے کہا کہ آج دنیا بھر میں ان اقدار کو شدید خطرات لاحق ہیں، جن میں مذہب کے نام پر ہونے والی انتہاپسندی، قتل عام، نسل کشی اور عدم برداشت شامل ہیں۔ انہوں نے 7 اکتوبر 2023 کے بعد غزہ میں جاری مظالم، نائجیریا، بھارت، کشمیر اور یورپ میں اقلیتوں کے خلاف ہونے والے جرائم کی مثالیں دیتے ہوئے کہا کہ انتہاپسندی نے دنیا کو ایک بار پھر اخلاقی بحران میں دھکیل دیا ہے۔ سابق چیف جسٹس آف پاکستان مسٹرجسٹس جیلانی نے تاریخی حوالوں سے ثابت کیا کہ انتہاپسندی اور قانون کی حکمرانی کبھی ہم آہنگ نہیں ہو سکتیں۔ انہوں نے زور دیا کہ تمام مذاہب انسانیت، برداشت اور باہمی احترام کا پیغام دیتے ہیں۔