9 مئی، سال بعد یاد آیا ملزمہ نے کوئی جرم بھی کیا ہے؟ جسٹس اشتیاق

اسلام آباد(نمائندہ جنگ )عدالت عظمیٰ میں نو مئی مقدمات میں پی ٹی آئی کی رہنما ،ملزمہ صنم جاوید کی بریت کے ہائیکورٹ کے فیصلے کیخلاف پنجاب حکومت کی اپیل کی سماعت کے دوران جسٹس ہاشم خان کاکڑ نے آبزرویشن دی ہے کہ ملزمہ صنم جاوید کیخلاف اب یہ مقدمہ کیوں چلانا چاہتے ہیں؟اس مقدمہ میں جو کچھ ہے،بس ہم کچھ نہ ہی بولیں تو ٹھیک ہے جبکہ جسٹس اشتیاق ابراہیم نے ریمارکس دیئے ہیں کہ ایک سال بعد یاد آیا کہ ملزمہ نے کوئی جرم بھی کیا ہے؟کیا پتہ کل کو آپ میرا یا کسی اورکا نام بھی نو مئی مقدمات میں شامل کردایں،جسٹس ہاشم خان کاکڑ کی سربراہی میں قائم تین رکنی بینچ نے منگل کے روز حکومت پنجاب کی اپیل کی سماعت کی تو حکومت پنجاب کے لاء افسر نے موقف اختیار کیا کہ ملزمہ صنم جاوید کے ریمانڈ کیخلاف لاہور ہائیکورٹ میں درخواست دائر ہوئی تھی تاہم عدالت نے ملزمہ کو مقدمہ سے ہی بری کردیا ہے ،جس پرجسٹس ہاشم کاکڑ نے کہاکہ ان مقدمات میں تو عدالت ہدایات جاری کرچکی ہے۔