حکومتی بد انتظامی کے سبب 67ہزار عازمین کا حج داؤ پر لگ گیا ،سینیٹر عبدالقادر

اسلام آباد (نمائندہ جنگ )چیئرمین قائمہ کمیٹی برائے دفاعی پیداوار سینیٹر محمد عبدالقادر نے کہا ہے کہ حکومتی بدانتظامی کے سبب 67ہزار عازمین کا حج داؤ پر لگ گیا ہے۔ حج سے متعلق اکثر و بیشترسکینڈلز سامنے آتے رہتے ہیں لیکن کبھی ملوث افراد کیخلاف قانونی کارروائی نہیں ہوئی، وزارت مذہبی امور کا کام ہی حج و عمرہ کے معاملات کو احسن طریقے سے بروقت انجام تک پہنچانا ہوتا ہے۔ حجاج کی ایک خاص تعداد حکومت کے زیر انتظام حج پالیسی کے تحت حج کرتی جبکہ حج کوٹہ کے تحت نجی حج آرگنائزرز عازمین کے حج کے معاملات کے ذمہ دار ہوتے ہیں ہر برس حج انتظامات بد انتظامی کا شکار ہو جاتے ہیں جس وجہ سے ہزاروں عازمین کو بے انتہا مشکلات کا سامنا کرنا پڑتا ہے۔ حج سے متعلق اکثر و بیشتر طرح طرح کے اسکینڈلز سامنے آتے رہتے ہیں لیکن کبھی ان اسکینڈلز میں ملوث افراد کے خلاف قانونی کاروائی عمل میں نہیں لائی گئی۔ اپنے بیان میں انہوں نے کہا ہے کہ امسال نجی حج اسکیم کے 67 ہزار عازمین کے معاملے پر حج آرگنائزرز، پڑائیوٹ ٹور آپریٹرز اور حکومت آمنے سامنے آگئے ہیں۔