معاشرے میں امن کیلئے مذہبی رواداری بیحد ضروری، وفاقی وزیر مذہبی امور

اسلام آباد( نمائندہ جنگ)وفاقی وزیر مذہبی امور سردار محمد یوسف نے کہا ہے کہ ہم تمام مذاہب کے ماننے والوں کا احترام کرتے ہیں ، پاکستان کے آئین کے تحت تمام مذاہب کے ماننے والوں کو مذہبی آزادی حاصل ہے ، معاشرے میں امن کیلئے مذہبی رواداری بے حد ضروری ہے۔ منگل کو اسلام آ باد ہولی کی تقریب سے خطاب کرتے ہوئے انہوں نے کہا کہ وزارت مذہبی امور و بین المذاہب ہم آہنگی ہر سال مختلف برادریوں کے مذہبی تہوار مناتی ہے ، پاکستان کے آئین میں ضمانت دی گئی ہے کہ سب مذاہب کے ماننے والوں کو مذہبی آزادی ہے ، قائد اعظم نے پاکستان کے جھنڈے میں سفید رنگ شامل کرکے اقلیتوں کے حقوق کی ضمانت دی ، ہم سب پاکستانی ہیں، ایک دوسرے کی خوشیوں اور غم میں برابر کے شریک ہیں ۔ انہوں نے کہا کہ وزیر اعظم شہباز شریف کی ہدایت ہے کہ تمام مذاہب کے ماننے والوں کا احترام کرتے ہوئے ان کی مذہبی تقاریب منائی جائیں۔