26اپریل کو ملک بھر کے تاجر فلسطینیوں سے اظہار یکجہتی کرینگے‘ رحیم آغا

کوئٹہ(پ ر)انجمن تاجران بلوچستان کے صدر رحیم آغانے اسرائیل کی جانب سے فلسطین پر جاری مظالم کے خلاف26اپریل کو ملک بھر میں شٹرڈاؤن ہڑتال کا اعلان کرتے ہوئے کہا ہے کہ پاکستان سمیت بلوچستان بھر کے تاجر فلسطینی مسلمانوں کے شانہ بشانہ کھڑے ہیں اور عالم اسلام کی فلسطین پر جاری مظالم پر خاموشی سمجھ سے بالاتر ہے ،تاجربرادری سے اپیل ہے کہ وہ ملک بھر کی طرح بلوچستان سمیت صوبائی دارالحکومت کوئٹہ میں کاروبار اور دکانیں بند کرکے فلسطینی عوام کے ساتھ اظہار یکجہتی کا ثبوت دیں۔یہ بات انہوں نے جماعت اسلامی کے صوبائی امیر و رکن اسمبلی مولانا ہدایت الرحمٰن سے ملاقات کے موقع پر بات چیت کرتے ہوئے کہی۔ اس سے قبل مولانا ہدایت الرحمٰن بلوچ کی قیادت میں جماعت اسلامی کا وفد انجمن تاجران بلوچستان کے دفتر پہنچا جہاں مولانا ہدایت الرحمن نے جماعت اسلامی کی جانب سے 26اپریل کو ملک بھر میں اسرائیلی مظالم اور جارحیت کے خلاف ہڑتال کے اعلان سے متعلق انجمن تاجران بلوچستان کے صدر رحیم آغا سے کوئٹہ سمیت بلوچستان بھر میں شٹرڈاؤن ہڑتال کی کامیابی کی اپیل کی جس پر رحیم آغا نے جماعت اسلامی کی جانب سے شٹرڈاؤن ہڑتال کی حمایت کا اعلان کیا اور ہرممکن تعاون کی یقین دہانی کرائی ۔اس موقع پر رحیم آغا نے کہاکہ آل پاکستان انجمن تاجران کے چیئرمین خواجہ محمد شفیق نے 26اپریل کو ملک بھر میں اسرائیل کے فلسطینیوں پر جاری مظالم کیخلاف شٹرڈاؤن ہڑتال کا اعلان کیا ہے جس کی انجمن تاجران بلوچستان مکمل حمایت اور کوئٹہ سمیت بلوچستان بھر میں شٹرڈاؤن ہڑتال کا اعلان کرتی ہے ۔