مستونگ میں لیویز اہلکاروں پر حملہ بزدلانہ کارروائی ہے ،نور محمد دمڑ

ہرنائی ( نامہ نگار )پاکستان مسلم لیگ ن کے مرکزی رہنماء صوبائی وزیر خوراک حاجی نورمحمد خان دمڑ نے مستونگ میں انسداد پولیو ٹیم کے سیکورٹی پر مامور لیویز اہلکاروں پر دہشت گرد حملے کی مذمت کرتے ہوئے کہاہےکہ لیویز پولیس سمیت سیکورٹی اداروں پر حملہ ناقابلِ برداشت ہے۔انہوں نے کہاکہ لیویز اہلکاروں پر حملہ قومی سلامتی پر حملہ ہے جام شہادت نوش کرنے والے لیویز اہلکاروں کو خراج عقیدت پیش کرتے ہیں۔ غمزادہ خاندان کی غم میں پوری قوم برابر کا شریک ہے دہشت گرد عناصر کے خلاف پاک فوج تمام سیکورٹی ادارے اور حکومت فوری اور مؤثر کارروائی کررہی ہے۔ دہشت گردوں کے خلاف جاری ٹارگٹڈآپریشن کی وجہ سے دہشت گردوں کو چھپنے کی جگہ بھی نہیں ملے گی۔ انہوں نے کہاکہ قانون نافذ کرنے والے اداروں کی قربانیاں رائیگاں نہیں جائیں گی،مستونگ میں لیویز اہلکاروں پر حملہ امن دشمنوں کی بزدلانہ کارروائی ہے،قوم کو ریاست مخالف عناصر کے خلاف متحد ہونا ہوگا،بلوچستان میں قیام امن کیلئے حکومت اور عوام ایک پیج پر ہیں۔