ای او بی آئی پنشن کی مد میں 2ارب 79 کروڑ روپے کی جعلی ادائیگیاں

اسلام آباد (مانیٹرنگ ڈیسک) مالی سال 23-2022ء کے دوران آڈٹ حکام کے مطابق ای او بی آئی نے 2 ارب 79 کروڑ روپے کی ادائیگیاں جعلی پنشنرز کو کیں جبکہ سیکرٹری اوورسیز نے پبلک اکاؤنٹس کمیٹی کو بریفنگ دی کہ یکم مئی سے ای او بی آئی کی پنشن بڑھائی جائے گی۔ پبلک اکائونٹس کمیٹی کا اجلاس جنید اکبر کی زیر صدارت گزشتہ روز ہوا جس میں وزارت اوورسیز پاکستانی کے آڈٹ پیراز کا جائزہ لیا گیا۔ آڈٹ حکام نے بتایا کہ ای او بی آئی نے جعلی پنشنرز کو 2 ارب 79 کروڑ روپے کی ادائیگیاں کیں۔ ای او بی آئی حکام نے بتایا کہ ادارے کے فنڈز کی مالیت 600 ارب روپے ہے، ملک میں ایک کروڑ کاروبار ہیں، 10 ملازمین والے ادارے کو پنشن فنڈ میں شامل کیا جاتا ہے۔ آڈٹ حکام نے الزم لگایا ہے کہ ملازمین کی عمر میں تبدیلی کر کے 5 ہزار افراد کو پنشن دی گئی ہے۔