اڑان پاکستان منصوبہ2030:تک ترقی کا جامع روڈ میپ تیار کرلیا ، احسن اقبال

اسلام آباد( تنویر ہاشمی ، کامرس رپو رٹر ) وفاقی وزیر منصوبہ بندی پروفیسر احسن اقبال نے کہا ہے کہ حکومت نے قومی ترقی کے ایک تاریخی سنگ میل کی جانب پیش قدمی کرتے ہوئے’’اُڑانِ پاکستان‘‘ کے نام سے ایک جامع اور دوراندیش منصوبہ متعارف کرایا ہےجس کا مقصد ملک کو برآمدات پر مبنی مضبوط معیشت میں تبدیل کرنا ہے، اڑان پاکستان منصوبے کے تحت 2030 تک ترقی کا جامع روڈ میپ تیار کر لیا ہے،صنعتی شعبے کی بحالی اور توسیع کے لیے جامع اصلاحات متعارف کرائی گئی ہیں،’’اُڑان پاکستان‘‘ کے تحت پاکستان سرمایہ کاروں کے لیے پرکشش منزل بنتا جا رہا ہے،نجی سرمایہ کاری سے برآمدات میں حیران کن اضافہ ممکن ہے ان خیالات کا اظہار انہوں نے پاکستان ایسوسی ایشن آف ایگزیبشن انڈسٹری کے زیر اہتمام پاکستان بحرین سرمایہ کاری کے حوالے اجلاس و ایکسپو کی افتتاحی تقریب سے خطاب کرتے ہوئے کیا ، اس موقع پر پاکستان ایسوسی ایشن آف ایگزبیشن انڈسٹری اور اڑان پاکستان کے مابین مفاہمت کی یادداشت پر دستخط ہوئے ، تقریب میں بحرین کے پاکستان میں سفیر محمد ابراہیم عبدالقادر ، پاکستان ایسوسی ایشن آف ایگزبیشن انڈسٹری کے بانی چیئرمین خورشید برلاس ، چیئرمین فہد برلاس، گریٹر برمنگھم چیمبر آف کامرس برطانیہ کے صدر ناصر اعوان ، سابق سفیر افضال احمد، راولپنڈی چیمبر آف کامرس کے سرپرست اعلی ٰ سہیل الطاف ، سردار طاہر ، چوہدری عبدالرئوف اور دیگر کاروباری و سفارتی شخصیات موجود تھی۔