وفاقی کابینہ نے نیشنل سائبر کرائم انویسٹی گیشن ایجنسی تشکیل دیدی

اسلام آ باد ( رانا غلام قادر ) سوشل میڈیا پر فیک نیوز پھیلانے والے خبردار ہوجائیں کہ ا ن پر شکنجہ سخت ہونیوالا ہے۔ ذرائع کے مطا بق وفاقی کابینہ نے پیکا ایکٹ کے تحت اہم فیصلے کرتے ہوئے نیشنل سائبر کرائم انویسٹی گیشن ایجنسی (این سی سی آئی اے) کے قیام کی منظوری دیدی،نیشنل سائبرکرائم انویسٹی گیشن ایجنسی پیکا ایکٹ کے تحت جرائم کی تحقیقات کرے گی،اطلاق 4 اپریل 2025 سے ہوگا۔واضح رہے کہ 4 اپریل کو نیشنل سائبر کرائم انویسٹی گیشن ایجنسی کے پہلے ڈائریکٹر جنرل کے طور پر وقارالدین سید کو تعینات کیا گیا ہے جو اس سے قبل FIA کے سائبر کرائم سرکل کے ڈائریکٹر رہ چکے تھے۔ ذرائع کے مطا بق وفاقی کابینہ نے سوشل میڈیا پروٹیکشن اینڈ ریگولیٹری اتھارٹی ،سوشل میڈیا کمپلینٹ کونسل اور سوشل میڈیا پروٹیکشن ٹربیونل کے قیام کی بھی منظوری دیدی ہے، وفاقی کابینہ نے ان فیصلوں کی منظوری وزارت داخلہ و انسداد منشیات ڈویژن کی جانب سے سرکولیشن کے ذریعے پیش کی گئی سمریوں پر دی، اتھارٹی کل 9 اراکین پر مشتمل ہو گی ،ترمیمی ایکٹ پر عملدرآمد کے لیے وفاقی حکومت سوشل میڈیا پروٹیکشن ٹربیونل قائم کرے گی، ٹربیونل کا چیئرمین ہائی کورٹ کا سابق جج ہو گا، صحافی، سافٹ ویئر انجینئر بھی ٹربیونل کا حصہ ہوں گے۔