بنگلہ دیش سے تعاون گہرا کرنے کے خواہاں ہیں، خواجہ آصف

  اسلام آباد(صالح ظافر) وزیر دفاع خواجہ محمد آصف نے بنگلہ دیش کے 54ویں یومِ آزادی اور یومِ قومی جشن کے موقع پر سرینا ہوٹل میں منعقدہ استقبالیہ تقریب سے بطور مہمان خصوصی خطاب کرتے ہوئے پاکستان اور بنگلہ دیش کے عوام کے درمیان محبت اور اخوت کا ذکر کیا۔یہ استقبالیہ بنگلہ دیش کے ہائی کمشنر محمد اقبال حسین خان اور ان کی اہلیہ روشاں ناہید نے منعقد کیا تھا۔خواجہ آصف نے دونوں ممالک کے خوشگوار تعلقات کا حوالہ دیتے ہوئے کہا کہ دونوں دارالحکومتیں اقتصادی، سیاسی اور ثقافتی تعاون کو مزید فروغ دینے کے لیے سرگرمی سے کام کر رہی ہیں۔انہوں نے کہا: "ہم بنگلہ دیش کے ساتھ اپنے تعلقات کو قدر کی نگاہ سے دیکھتے ہیں اور مختلف شعبوں میں تعاون کو مزید گہرا کرنے کے خواہاں ہیں۔بنگلہ دیش کے ہائی کمشنر محمد اقبال حسین خان، جو اپنی پہلی یومِ آزادی کی تقریب کی میزبانی کر رہے تھے اور گزشتہ ہفتے ڈھاکہ سے پاکستان کی سیکریٹری خارجہ محترمہ آمنہ بلوچ کے کامیاب دورے کے بعد واپس آئے تھے، مہمانوں کی بڑی تعداد میں آمد پر خوش نظر آئے۔انہوں نے اپنے خطاب میں پاکستان کے ساتھ مضبوط اور دوستانہ تعلقات برقرار رکھنے کی خواہش کا اظہار کیا۔اس موقع پر بنگلہ دیش کی ثقافت کے رنگ بھی بکھرے، جن میں روایتی کھانوں جیسے بنگالی رس گلے اور بیکی مچھلی نے تقریب کو یادگار بنا دیا۔