روس اور برطانیہ نے پاکستان کے سفر پر وارننگ جاری کر دی

اسلام آباد (جمیلہ اچکزئی) مقبوضہ کشمیر میں 22 اپریل کو سیاحوں کو نشانہ بنانے والے مہلک فائرنگ کے حملے کے بعد پاکستان اور بھارت میں بڑھتی ہوئی کشیدگی کے درمیان، روس اور برطانیہ نے اپنے شہریوں کو پاکستان سفر کرنے سے متعلق احتیاطی تدابیر اختیار کرنے کی ہدایت کردی۔ اسلام آباد میں روسی سفارتخانے نے اپنے آفیشل فیس بک پیج پر روسی زبان میں ایک پیغام پوسٹ کرتے ہوئے اپنے شہریوں کو پاکستان کا سفر کرنے سے گریز کرنے کی ہدایت کی ، برطانیہ کے دفترِ خارجہ، دولتِ مشترکہ اور ترقی (ایف سی ڈی او) نے اپنے سفری مشورے کو اپ ڈیٹ کیا ہے، جس میں برطانوی شہریوں کو خاص طور پر بھارت سے ملحقہ پاکستانی علاقوں کا سفر کرنے سے سختی سے احتیاط کی ہدایت کی گئی ہے۔ اس مشورے میں یہ بھی ذکر کیا گیا کہ اگر شہری سرکاری رہنمائی کے خلاف سفر کرتے ہیں تو ان کی سفری انشورنس منسوخ ہو سکتی ہے۔