اسلام آباد ہائیکورٹ میں ججز تبادلے آئین کیساتھ فراڈ ، لاہور ہائیکورٹ بار

اسلام آباد(جنگ رپورٹر) اسلام آباد ہائی کورٹ میں ججز تبادلے آئین کیساتھ فراڈ ، لاہور ہائیکورٹ بار ،ملک کی دیگر ہائیکورٹوں سے اسلام آباد ہائیکورٹ میں تین ججوں کے تبادلہ اور نئی سینارٹی لسٹ کی تشکیل سے متعلق سپریم کورٹ کے آئینی بنچ میں زیر سماعت مقدمہ میں درخواست گزار لاہور ہائیکورٹ بار ایسوسی ایشن نے بھی اپناجواب جمع کرا دیا ہے، سوموار کے روز جمع کروائے گئے جواب میں موقف اختیار کیا گیا ہے کہ دستاویزات سے واضح ہوگیا ہے ملک کی دیگر ہائیکورٹوں سے اسلام آباد ہائی کورٹ میں ججوں کے تبادلہ کاعمل آئین کیساتھ فراڈ کے مترادف ہےجس کا نوٹیفکیشن کالعدم قرار دیئے جانے کے قابل ہے، تبادلوں کیلئے ججوں کے نام سیکرٹری قانون کی سمری میں سامنے آئے ہیں اور کہا گیا ہے کہ اسلام آباد ہائیکورٹ کیلئے اندرون سندھ سے کوئی جج موجود نہیں حالانکہ اندرون سندھ سے جسٹس خادم سومرو سے سینئر بھی سات ججوں کے نام موجود تھے ۔