نہروں کا منصوبہ ختم کرنا سندھ کے باشعور افراد کی کامیابی ہے ،پیر پگارا

کراچی(,اسٹاف رپورٹر)حروں کے روحانی پیشوا پیر صاحب پگارا نے دریائے سندھ سے نئی نہریں نکالنے کے منصوبے کو ختم کرنے کے حکومتی فیصلے کو کسی بھی سیاسی جماعت کی نہیں بلکہ سندھ کے تمام باشعور نوجوانوں ،بچوں ،بوڑھوں اور خواتین کی مشترکہ کامیابی قرار دیا ہے اپنے بیان میں انہوں نے کہا کہ سندھ کے باشعور لوگوں نے شدید گرمی اور سخت موسم کی پراوہ کئے بغیر چھوٹے چھوٹے قصبوں اور دیہاتوں میں اپنے حق کے لئے بے مثال احتجاج کیا جس کے نتیجے میں یہ کامیابی ممکن ہوسکی - پیر صاحب پگارا نے کہا کہ ان کا پہلے دن سے یہ موقف رہا ہے کہ اس وقت ہماری سرحدوں پر جو جنگ کے خطرات منڈلارہے ہیں اس موقع پر پوری قوم کو متحد ہوکر پاک فوج کے شانہ بشانہ کھڑے ہونے کی ضرورت ہے - انہوں کہا کہ پوری قوم اور حر جماعت اپنی مسلح افواج کے ساتھ ہیں -