پاکستان کے ساتھ مختلف شعبوں میں تعاون کا فروغ چاہتے ہیں، ہائی کمشنر بنگلہ دیش

اسلام آباد ( جنگ نیوز)بنگلہ دیش کے ہائی کمشنر ایم ڈی اقبال حسین خان نے کہا ہے کہ بنگلہ دیش 50 سال بعد پاکستان کے ساتھ اپنے دیرینہ تعلقات کو دوبارہ استوار کرنے کے لیے گرم جوشی سے آگے بڑھ رہا ہے۔ ہم تجارت و سرمایہ کاری کے ساتھ ساتھ ثقافت، کھیل، اور سیاحت کے شعبوں میں بھی دوطرفہ تعاون کو مزید فروغ دینا چاہتے ہیں۔ پاکستانی شہریوں کے لیے بنگلہ دیش کا ویزا انتہائی آسانی سے آن لائن جاری کیا جاتا ہے۔ ان خیالات کا اظہار انہوں نے یونائٹیڈ بزنس گروپ (یو بی جی) کے سیکرٹری جنرل ظفر بختاوری، اسلام آباد چیمبر آف کامرس اینڈ سنڈسٹری کے سابق صدر احسن بختاوری اور چکوال چیمبر آف کامرس اینڈ انڈسٹری کے سابق صدر وقار بختاوری سے ملاقات کے دوران کیا۔ ظفر بختاوری نے پاکستان اور بھارت کے درمیان تیزی سے بگڑتی ہوئی صورتحال پر تشویش کا اظہار کیا اور کہا کہ خطے میں امن و استحکام کے لیے تمام علاقائی ممالک کو اپنا مؤثر کردار ادا کرنا چاہیے۔