اسلام آباد ہائیکورٹ ؛ DGامیگریشن /پاسپورٹ کو عدالت پیش ہونے کا حکم

اسلام آباد (خبر نگار) اسلام آباد ہائیکورٹ کے جسٹس بابر ستار نے نجی کمپنی کے منیجنگ ڈائریکٹر کا نام سفری پابندی کی فہرست سے نکالنے سے متعلق کیس میں ڈی جی امیگریشن اینڈ پاسپورٹ مصطفیٰ جمال قاضی کو ذاتی حیثیت میں عدالت طلب کرتے ہوئے کہا ہے کہ ڈی جی پیش ہو کر عدالت کو مطمئن کریں کہ نام سفری پابندی کی فہرست میں کیوں شامل کیا گیا۔ گذشتہ روز عبدالقادر کی درخواست پر سماعت کے دوران ان کے وکیل نے موقف اختیار کیا کہ درخواست گزار کا نام ایف بی آر کی سفارش پر سفری پابندی کی فہرست میں شامل کیا گیا۔ وکیل ایف بی آر نے کہا کہ ایف بی آر نے کمپنی سے 3 ارب روپے کی ڈیمانڈ کی اور درخواست گزار اُس کا ایم ڈی ہے۔ عبدالقادر کا نام وفاقی کابینہ کی منظوری سے سفری پابندی کی فہرست میں شامل کیا گیا۔