ای او بی آئی کو خود مختاراور اعلیٰ کارکردگی والا ادارہ بنایا جائیگا،چوہدری سالک حسین

اسلام آباد (خصوصی نمائندہ)وفاقی وزیر برائے اوورسیز پاکستانیز و ترقی انسانی وسائل چوہدری سالک حسین کو مالی سال 25۔2024 کی تین سہ ماہیوں کے دوران ایمپلائز اولڈ ایج بینیفٹس انسٹی ٹیوشن (ای او بی آئی) کی کارکردگی سے متعلق بریفنگ دی گئی۔ گزشتہ روز بریفنگ کے دوران وفاقی وزیر کو بتایا گیا کہ چیئرمین ای او بی آئی خاقان مرتضیٰ کی ستمبر 2024 میں ریٹائرمنٹ کے بعد ادارے کے سینئر ترین افسر ڈاکٹر جاوید اے شیخ کو چیئرمین کا قائم مقام چارج دیا گیا۔وفاقی وزیر چوہدری سالک حسین نے ای او بی آئی کی غیر معمولی کارکردگی پر اطمینان کا اظہار کیا اور اس عزم کا اعادہ کیا کہ ادارے کو خودمختار، شفاف اور اعلیٰ کارکردگی والا ادارہ بنایا جائے گا۔ انہوں نے انتظامیہ کو ہدایت کی کہ ای او بی آئی کی سماجی تحفظ کی سکیموں کے دائرہ کار کو وسیع کیا جائے، خصوصاً قانون میں ترمیم کے ذریعے اُن اداروں کو بھی شامل کیا جائے جن میں دس سے کم ملازمین کام کرتے ہیں، نیز ان شعبوں کو بھی شامل کیا جائے جو فی الحال ای او بی ایکٹ سے مستثنیٰ ہیں۔