ترکیہ نے پاکستان کیلئے اسلحہ سے بھرے 6 لڑاکا طیارے بھیجنے کی تردید کردی

کراچی (نیوز ڈیسک) ترکیہ نے بھارتی میڈیا کے ان دعوؤں کی تردید کی ہے کہ اس نے ہتھیاروں سے لدے 6لڑاکا طیارے پاکستان بھیجے ہیں، ترک وزارت دفاع کا کہنا ہے کہ ترک فضائیہ کا ایک ٹرانسپورٹ طیارہ پاکستان میں صرف ایندھن بھرنے کے لیے اترا تھا اور پھر اپنے طے شدہ راستے پر روانہ ہو گیا۔ وزارت نے کہا، "یہ دعویٰ کہ ʼترکیہ نے چھ ہتھیاروں سے لدے طیارے پاکستان بھیجے،ʼ جو بعض ذرائع ابلاغ میں رپورٹ ہوا، درست نہیں ہے۔بیان میں عوام پر زور دیا گیا کہ وہ مجاز افراد یا اداروں کے بیانات کے بغیر بنائی گئی قیاس آرائیوں پر مبنی خبروں پر یقین نہ کریں۔