پاکستان ،قازقستان ریل لنک کی فیزیبلٹی پر کام شروع کیا جائے،وزیراعظم

اسلام آباد( نیو زرپورٹر) وزیراعظم شریف نے کہا ہے کہ پاکستان اور قازقستان کے درمیان ریل لنک کے حوالے سے فیزیبلٹی پر کام شروع کیا جائے دونوں ممالک میں بزنس ٹو بزنس تعلقات کو استوار کرنا ترجیح ہے وزیر اعظم نے ان خیا لات کا اظہار گزشتہ روز قازقستان کے وزیر ٹرانسپورٹ مرات کاراباییو سے ملاقات کے دوران کیا۔ وزیراعظم نے کہا ہے کہ پاکستان اور قازقستان کے درمیان ریل لنک پورے علاقے کے لئے ایک گیم چینجر ثابت ہوگا جو کہ وسطی ایشیائی ریاستوں کو گوادر پورٹ سے جوڑے گا،ریل لنک فزیبیٹی اور تکنیکی معاملات کے حوالے سے ایک وفد جلد قازقستان کا دورہ کرے گا، دونوں ممالک کے درمیان بزنس ٹو بزنس تعلقات کو استوار کرنا ترجیح ہے ۔وزیر اعظم نے کہا کہ قازقستان اور پاکستان کے درمیان براہ راست ہوائی رابطوں کے حوالے سے پی آئی اے لائحہ عمل بنائے۔ قازق وزیر نے کہا کہ قازقستان کی تاجر برادری و سرمایہ کاروں نے پاکستان کے ساتھ بزنس ٹو بزنس تعلقات استوار کرنے کے حوالے سے گہری دلچسپی کا اظہار کیا ہے۔