مخصوص نشستوں کاکیس، دوججز کا اختلافی نوٹ سامنے آگیا

اسلام آباد(جنگ رپورٹر)قومی اسمبلی اور صوبائی اسمبلیوں میں پی ٹی آئی کے کوٹہ کی مخصوص نشستوں کی الاٹمنٹ کے مقدمہ کے فیصلے کیخلاف دائر نظرثانی کی درخواستوں کے فیصلہ میں جسٹس عائشہ ملک اور جسٹس عقیل عباسی کا اختلافی نوٹ سامنے آگیا درخواست گزاروں کی جانب سے کسی غلطی کی نشاندہی نہیں کی گئی ،جسٹس عائشہ ملک و جسٹس عقیل عباسی ، اختلافی نوٹ میں قراردیا گیا ہے کہ نظر ثانی درخواستوں میں درخواست گزاروں کی جانب سے کسی غلطی کی نشاندہی نہیں کی گئی ،پیپلز پارٹی اور ن لیگ نے بھی صرف مختصر حکمنامہ پر نظرثانی دائر کی تھی جس کے بعدتفصیلی فیصلہ آئے ہوئے بھی سات ماہ گزر چکے ہیں لیکن دونوں جماعتوں نے تفصیلی فیصلہ چیلنج نہیں کیا ہے ، اختلافی نوٹ کے مطابق الیکشن کمیشن نے بھی پی ٹی آئی کے فریق نہ ہونے کا نکتہ ہی اٹھایا ہےاس اعتراض کا جواب تفصیلی فیصلے میں دیا جاچکا ہے۔