گوجرانوالہ میں بیک وقت کئی میگا پراجیکٹس:محکمانہ کوآرڈنیشن کی ضرورت

لاہور(رپورٹ: آصف محمود بٹ ) پنجاب حکومت کی جانب سے گوجرانوالہ میں ایک ساتھ کئی میگا انفراسٹرکچر منصوبوں پر تیزی سے پیش رفت جاری ہے، جن میں بس ریپڈ ٹرانزٹ (بی آر ٹی) نظام، الیکٹرک بسوں کا اجرا، سنگنل فری کاریڈور، سیف سٹی پروجیکٹ اور بجلی کے کھمبوں و تنصیبات کی ازسرنو ترتیب شامل ہیں۔ اگرچہ ان تمام اقدامات کا مقصد شہر کو جدید، پائیدار اور ٹیکنالوجی سے ہم آہنگ بنانا ہے، تاہم اربوں روپے کی سرکاری سرمایہ کاری کے تحفظ، پہلے سے موجود منصوبوں کی حفاظت اور عوامی سہولیات کے تسلسل کو برقرار رکھنے کے لیے ماہرین اور سرکاری حکام نے فوری طور پر محکموں کے درمیان کوآرڈنیشن اور مربوط حکمت عملی کو ناگزیر قرار دیا ہے۔گوجرانوالہ میں اس وقت 5.7 ارب روپے کی لاگت سے "سنگنل فری کاریڈور" منصوبہ زور و شور سے جاری ہے، جو چن دا قلعہ چوک سے عزیز بائی پاس تک 12.7 کلومیٹر طویل جی ٹی روڈ کو یو ٹرنز، فلائی اوورز، انڈرپاسز اور جدید ڈیزائن کے ذریعے مکمل طور پر سنگنل فری بنائے گا۔ اس منصوبے کی تکمیل جون 2025 تک متوقع ہے اور اس کی نگرانی براہ راست سیکریٹری کمیونیکیشن اینڈ ورکس کر رہے ہیں ۔