او آئی سی-15 ڈائیلاگ پلیٹ فارم کی دوسری وزارتی کانفرنس تہران میں شروع

اسلام آباد ( ساجد چوہدری ) او آئی سی-15 ڈائیلاگ پلیٹ فارم کی دوسری وزارتی کانفرنس تہران میں شروع ہوگئی، جس میں اسلامی دنیا میں سائنس، ٹیکنالوجی اور اعلیٰ تعلیم کے شعبوں کو مصنوعی ذہانت کے ذریعے فروغ دینے پر بھرپور توجہ مرکوز کی جائے گی،’’مصنوعی ذہانت کے ذریعے سائنس و ٹیکنالوجی میں جدت ، اسلامی دنیا کا روشن مستقبل‘‘ کے عنوان سے تین روزہ کانفرنس کا مقصد مسلم ممالک کو درپیش سائنسی و ترقیاتی چیلنجز کا مشترکہ حل تلاش کرنا اور باہمی تعاون کو فروغ دینا ہے، کانفرنس میں او آئی سی کے رکن ممالک کے وزرائے سائنس، اعلیٰ سطحی نمائندے اور ٹیکنالوجی کے ماہرین شرکت کررہے ہیں، اجلاس کے دوران اسلامی دنیا کے لئے مصنوعی ذہانت سے متعلق پہلا کثیرالملکی معاہدہ منظور کیے جانے کی توقع ہے،وزارتی اجلاس سے قبل سینئر آفیشلز میٹنگ ہوئی، جس کی مشترکہ صدارت کامسٹیک کے کوآرڈینیٹر جنرل پروفیسر ڈاکٹر اقبال چوہدری اور ایران کے نائب وزیر سائنس پروفیسر فرہاد یزدان دوست نے کی، اجلاس میں برونائی دارالسلام، پاکستان، انڈونیشیا، سعودی عرب، ترکیہ، ملائیشیا، قازقستان، ایران اور او آئی سی سیکرٹریٹ کے نمائندوں نے شرکت کی ، اجلاس کے دوران رکن ممالک کے درمیان دو طرفہ ملاقاتیں بھی منعقد ہوں گی جبکہ ایک خصوصی نمائش کا بھی اہتمام کیا گیا ہے جس میں سائنسی، تحقیقی و تکنیکی میدان میں اسلامی ممالک کی کامیابیاں اور اختراعات پیش کی جائیں گی۔