لاہور، شہباز شریف اور حمزہ کی فوری ضمانت منسوخی کی درخواست مسترد

لاہور (صباح نیوز)ایف آئی اے کی اسپیشل سینٹرل کورٹ کے جج اعجاز الحسن نے منی لانڈرنگ کیس میں مسلم لیگ (ن) کے صدر، قومی اسمبلی میں قائد حزب اختلاف میاں شہباز شریف اور پنجاب اسمبلی میں قائد حزب اختلاف حمزہ شہباز شریف کی عبوری ضمانتوں کی فوری طور پر منسوخی کے لئے ایف آئی اے کی جانب سے دائر درخواست مسترد کر دی۔عدالت نے قراردیا ہے کہ دوسرے فریق کو سنے بغیر عدالت فیصلہ نہیں کرسکتی۔ عدالت نے اس حوالہ سے شہباز شریف اور حمزہ شہباز کو نوٹسز جاری کرتے ہوئے 4اپریل کو جواب طلب کر لیا ہے اور وکلاء کوبھی4 اپریل کو بحث کے لئے طلب کر لیا۔ قبل ازیں ہفتہ کو منی لانڈرنگ کیس میں شہباز شریف اور حمزہ شہباز شریف کی ضمانت منسوخی کے لئے ایف آئی اے کی اسپیشل سینٹرل کورٹ میں درخواست دائر کردی گئی۔ درخواست وفاقی وزیر قانون فواد چوہدری کی ہدایت پر اسپیشل پراسیکیوٹر سکندر کی جانب سے دائر کی گئی ہے۔ درخواست میں مئوقف اختیار کیا گیا ہے کہ شہباز شریف اور حمزہ شہباز عبوری ضمانت کا ناجائز فائدہ اٹھا رہے ہیں۔