رواں سال کے 10ماہ میں 15کروڑ 83لاکھ ڈالر سے زائد تمباکو کی برآمدات

اسلام آباد( کامرس رپور ٹر) رواں مالی سال جولائی تا اپریل کے 10ماہ میں پاکستان کی تمباکو کی برآمدات 15کروڑ83لاکھ 50ہزار ڈالر تک پہنچ گئی ہےاور یہ بیلجیئم ، متحدہ عرب امارات ، یونان ، فلپائن اور دیگر ممالک میں بڑھی ہے، پاکستان کے معروف تمباکو برآمد کنندگان کے ایک وفد نے منگل کو وفاقی وزیر تجارت جام کمال خان سے ملاقات کی اور تمباکو کی برآمدات میں اضافے اور ریو نیو و ضابطہ جاتی فریم ورک سے متعلقہ چیلنجز پر تبادلہ خیال کیا ، جام کمال خان نے وفد کو یقین دلایا کہ حکومت و نجی شعبے کے تعاون سے ملک کی تمباکو برآمدی صلاحیت کو بڑھایا جائے گا اور برآمد کنندگان کو تمام سہولیات مہیا کی جائیں گی ۔ برآمد کنندگان نے موجودہ ٹیکس ڈھانچے سے متعلق بتایا کہ تمباکو کے فی کلوگرام پر 390 روپے فیڈرل ایکسائز ڈیوٹی، 50 روپے صوبائی ایکسائز ڈیوٹی، 15.15 روپے فیڈرل ٹوبیکو سیس، اور 25 روپے صوبائی ڈویلپمنٹ سیس شامل ہیں یعنی مجموعی لاگت فی کلوگرام 480.15 روپے بنتی ہے۔وفاقی وزیر جام کمال خان نے برآمد کنندگان کے تحفظات کو تسلیم کرتے ہوئے کہا کہ حکومت متوازن اور ترقیاتی پالیسیوں کے لیے پرعزم ہے۔